Keıbir órkókirek jigitter burynǵy daǵdysyna basyp, quqyq qorǵaý ókilderine kúsh kórsetkisi keledi. Zańdylyqty teksergen polıseılerdiń jaǵasynan alyp, qorlaý sózderden bólek, reti kelse tekpilep ketýden de taıynatyndar az emes.
Jaqynda Saryaǵash aýdandyq sotynda osyndaı is qaralǵan. Sýdıa Samal Jolmuratqyzy aıtqandaı, jas jigit jol erejesin óreskel buzǵanymen qoımaı, osy zańsyzdyqqa baılanysty hattama toltyrǵan polıseıdi tómpeshtep tastaǵan. Tergeý barysynda júrgizýshiniń kinási tolyq dálel tapqan. Ol endi QR QK-niń «quqyq qorǵaý organy qyzmetkeriniń ómirine qolsuǵýshylyq» baby boıynsha aıyptalyp, jazaǵa kesildi. Sózinen qoly uzyn jigit bir jyl alty aıǵa bas bostandyǵynan aıyryldy.
Áleýmettik jelide jigitterdi qoıyp, áıelderdiń de polıseılerdiń pagonyn julyp, aıaq-qolyn sermep uryp jatqan sátteri talaı jarııalanǵan bolatyn. Zańdylyqty jaqsy biletin polıseılerdiń deni qorǵanǵannan artyqqa barmaı keldi. «Kóp asqanǵa – bir tosqan». Endi shoqpardaı judyryǵyn ala júgirgender aqylǵa keletin shyǵar.
Baqtııar TAIJAN, «Egemen Qazaqstan»
Ońtústik Qazaqstan oblysy