Astana ákimi tegin medısınalyq dári-dármekterdi jetkizýge qatysty jaǵdaıdy baqylaýda ustaýdy tapsyrdy
Mundaı tapsyrmany apparattyq keńeste elorda ákimi Áset Isekeshev berdi. Qalalyq densaýlyq saqtaý basqarmasynyń basshysy Qamaljan Nadyrovtyń aıtýynsha, dári-dármekke qatysty jaǵdaıdy basqarma únemi óz baqylaýynda ustaıdy. Alaıda biryńǵaı dıstrıbıýter – «SK-Farmasııa» JShS tarapynan dári-dármekterdi jetkizý boıynsha kidirister oryn alyp, búgin emhanalardyń dárihanalarynda birqatar preparat joq.
Tegin dári-dármekterdi berýdiń ashyqtyǵyn qamtamasyz etý, sondaı-aq, dárilik preparattarmen, medısınalyq ónimdermen qamtý jaǵdaıyn únemi monıtorıngten ótkizý maqsatynda qalanyń barlyq emhanalarynda aqparattyq júıe ornatylyp jatyr.
Tegin medısınalyq kómektiń kepildendirilgen kólemi aıasynda ótken jyly qala boıynsha ambýlatorlyq deńgeıde tegin dárilik preparattarmen 100 myńnan astam adam qamtyldy. Bıyl tegin dári-dármekpen 120 myńǵa tarta adam qamtylady dep josparlanýda.
Sonymen qatar, dári-dármekterdiń qoljetimdiligin arttyrý maqsatynda densaýlyq saqtaý basqarmasynda dárilik zattar men medısınalyq ónimderdi qala emhanalaryndaǵy dárihanalarda tapsyrý jónindegi sheshim shyǵarylǵan bolatyn.
Keńes qorytyndysy boıynsha qala ákimi tegin medısınalyq dárilerdi jetkizýge qatysty kidirister «SK – Farmasııa» JShS kesirinen oryn alyp jatqandyǵyn aıtty. Alaıda ákimshilik tarapynan tıisti baqylaý jumystary men monıtorıngter júrgizilýi kerek bolatyn. Osyǵan oraı, Áset Isekeshev ákimniń orynbasary Ermek Amanshaev pen densaýlyq saqtaý basqarmasynyń basshysy Qamaljan Nadyrovqa eskertý jasady. Sondaı-aq, ol atalmysh máselege qatysty jaǵdaıdy únemi baqylaýda ustaýdy tapsyrdy.