Senim men izgilikti joǵary qoıyp, adal ómir súrip jatqan adamdar kóp. Jáne olardyń deni zańǵa da, bılikke de bek senedi. Sol senimderiniń adastyrmasyna ılanǵandyqtan da adamdar aldymen bıliktiń degenine den qoıady. Muny qarapaıym adamdar zańdylyq dep uǵady.
Alaıda qoǵamdaǵy keıbir keleńsizdikter azamattardyń senimine selkeý túsiredi. Máselen, qazir jasy jetpis beske kelgen Tileýles Áýbákirov 2000 jyly Aqmola oblysy Arshaly aýdanynyń Jibek joly aýylyna osyndaǵy aqsaqaldar alqasy kelisimimen jáne aýyldyq okrýg ákimdiginiń shaqyrýymen molla bolyp, otbasymen kóship keledi. Oǵan ıesiz qalǵan Mal sharýashylyǵy úıi men jeri paıdalanýǵa beriledi. Úıdiń jartysyn namazhanaǵa qaldyryp, shaǵyn bóligine otbasymen (alty adam) qonystanady.
Ári molla, ári kúzetshi bolyp jumys isteı bastaıdy. Keıin álgi eshkimge kereksiz bolyp qalǵan úıdiń ishi-syrtyn qalpyna keltirip jóndep alady. Sosyn ony zańdastyrmaq bolady. Mal sharýashylyǵy úıi eshkimge keregi joq qırap qalǵan ıesiz bolsa da, «Novo-Aleksandrovskıı» áleýmettik-kásipkerlik korporasııasynda tirkeýli eken. Olar T.Áýbákirovke osy úı túbegeıli berildi dep sheshim shyǵaryp, qolyna álgi qujattyń túpnusqasyn ustatqan. Sol anyqtama negizinde úıin zańdastyrmaq bolyp qarııa ákimdikke barsa, olar «úıdi jekeshelendirý týraly qajetti qujatty ózimiz jasaımyz, zańdastyramyz, siz alańsyz mollalyq qyzmetińizdi júrgize berińiz», deıdi. Álgi anyqtamany da ózderine alyp qalady. Jergilikti bıliktiń aıtqanyna ılanǵan qarııa molla bolyp júre beredi.
Sodan T.Áýbákirov bıyl ákimdikke úıdi zańdastyrmaq bolyp taǵy barady. Barsa, álgi ózi turyp jatqan úı «onda kópten beri eshkim turmaǵandyqtan jáne birneshe jyldan beri qaraýsyz qalǵandyqtan» Arshaly aýdandyq sotynyń 2013 jylǵy sheshimine saı kommýnaldyq menshikke ótip ketkenin estıdi. Tileýles aqsaqal bul habardy estigende júregi syr berip, qulap qala jazdaǵan. О́ıtkeni ol bul sheshim múlde shyndyqqa janaspaıdy dep esepteıdi. «Osy úıde sonaý 2000 jyldan beri otbasymyzben turyp kelemiz» deıdi kemseńdegen qarııa. Ony dáleldeıtin qaǵazdary da bar eken. Máselen, 17.26.01 jyly Jibek joly aýyldyq okrýginiń bas mamany A.Eńsebaeva «Anyqtama Aqmola oblysy, Arshaly aýdany, Jibek joly aýyldyq okrýgi ákiminiń apparatynan 1943 jyly týǵan Aýbakırov Tleýles Tleýbergenovıchke berildi. Ol osy okrýgke qarasty Jibek joly aýylyndaǵy Qazybek bı kóshesindegi №3 úıde turady» dep qolyn qoıǵan. Sol sııaqty osy aýyldyq okrýgtiń ákimi K.Ahmadııarov ta «Aýbakırov Tleýles Tleýbergenovıch Jibek joly aýylyndaǵy Qazybek bı kóshesindegi №3 úıde 2000 jyldan beri turyp keledi» dep anyqtama jazyp bergen. Úıdiń aı saıynǵy kommýnaldyq shyǵyndaryn tólep turǵan túbirtekteri de bar. Jáne bulardy aýyldaǵy kórshileriniń bári biledi.
Al aýdandyq ákimdik sotqa bul úıde eshkim turmaıdy, qaraýsyz qalǵan, sondyqtan 2013 jyly Arshaly aýdandyq ádilet basqarmasynyń anyqtamasymen Mal sharýashylyǵy ǵımaraty ıesiz dep tirkelgen dep, sony bekitýge usynys túsirgen. Oǵan dálel 2012 jyly 4 aqpanda Arshaly aýdandyq «Vpered» gazetinde atalǵan ǵımarattyń ıesine izdeý jarııalanypty. Sodan bir jyl boıy kútken syńaıly. Al bul jaıdan aqsaqal múlde habarsyz kórinedi. Ol, joǵaryda aıtqanymyzdaı, jergilikti bılikke senip júrgen.
О́ıtkeni munyń turyp jatqanyn bári biledi ǵoı. Mine, osylaısha osynshama jyl bul ǵımaratty jóndep, úı qalpyna keltirgen kezde Tileýles aqsaqal otbasymen dalada qalaıyn dep tur. Endi ıesiz qalǵan úıdi óz atyna jekeshelendirmek túgili, onyń qolynda kezinde qaraýsyz qalǵan úı ózine paıdalanýǵa berildi degen anyqtamanyń túpnusqasy da joq. Aýyl ákimdiginen, aýdannan surasa da tabylar emes. Munyń aq-qarasyn anyqtap, shyndyqty shyńyraýdan shyǵarýǵa aqsaqaldyń dármeni joq. T.Áýbákirovtiń aldandym dep anda-munda shaýyp, jany shyrqyrap júrýi tegin emes sekildi. Alaıda istiń aq-qarasyn joǵary turǵan sot qana jan-jaqty anyqtaı almaq. Sondyqtan aqsaqaldyń áli de úmiti bar.
Aleksandr TASBOLAT, «Egemen Qazaqstan»