Búgin QR Prezıdenti Nursultan Nazarbaevtyń tóraǵalyǵymen Qaýipsizdik keńesiniń otyrysy ótti, dep habarlaıdy Aqordanyń baspasóz qyzmeti.
«Jaqynda biz Úkimettiń byltyrǵy jylǵy istegen sharýalaryn barlyq jaǵynan, barlyq saladan tyńdadyq. Ol jumystardyń barlyǵyna jalpy alǵanda oń baǵa berdik. Istelinbeı jatqan sharýalardyń barlyǵyna tıisti tapsyrmalar berdik. El bolǵannan keıin sharýalar kóp bolady. Aldymyzdaǵy maqsattar kóp. Sebebi bizdiń qoıǵan uly maqsatymyz óte úlken. О́rkendegen, ósken 30 eldiń arasyna kirý úshin talaı sharýa jasaýymyz kerek», - dedi otyrysty ashqan Elbasy. Qazaqstan Prezıdenti damyǵan elderdiń qataryna qosylý jolynda birneshe kederginiń, qıynshylyqtardyń, ótkelderdiń bar ekendigin basa aıtty.
«Onyń barlyǵynan ótip, baǵdarlamalarymyzǵa tıisti ózgerister engizip otyrýymyz kerek. О́tken jyly elimizdiń qaýipsizdigin qamtamasyz etý jónindegi baǵdarlama qabyldadyq. Qaýipsizdik tek qana áskerı qaýipsizdik, ishki saıasat emes barlyq jaǵynan bolýy tıis. Barlyq salada jasaıtyn sharýalar kóp. Sondyqtan qalaı oryndalyp jatyr degen máselemen búgin jumys isteıtin bolamyz. Odan keıin osy salada bir oblysty árqashan tańdaımyz dedik. Ońtústik Qazaqstan oblysynda júrgizilip jatqan sharýany qaraýdyń arqasynda barlyq oblystarǵa ne isteý kerek ekendigi jóninen tıisti málimetter beremiz», - dedi Nursultan Nazarbaev.