Astanadaǵy Elbasy kitaphanasy Mýzeıinde Semeı qalasyndaǵy Balalar óner mektebi túlekteriniń dıplomdyq jumystary kórmesiniń ashylýy ótti.
Jyl basynan beri atalmysh murajaı N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyna oraı balalar shyǵarmashylyǵyn qoldaý boıynsha «Týǵan ólkem» jańa kórkemdik baǵdarlamasyn kezeń kezeńimen ótkizip kele jatyr. Baǵdarlamanyń seriktesi «Balalyq shaqtan kózqaras» jobasyn iske asyrýshy Astana qalasy Balalar kórkemsýret mektebi – IýNESKO klýby.
Sondaı-aq, baǵdarlamanyń basty taqyryptarynyń biri – Astananyń 20 jyldyǵy ekenin de aıta ketken jón. Mereıtoı qarsańynda uıymdastyrylyp jatqan bul kórme negizinen balalar shyǵarmashylyǵyn qoldaý boıynsha júzege asqan. «Týǵan ólkem» jańa baǵdarlamasy jas talanttardy anyqtaý jáne respýblıkanyń qosymsha bilim berý mekemesiniń jumysyn nasıhattaýǵa negizdelgen.
Baǵdarlamanyń aıasynda elordanyń qonaqtary men turǵyndary respýblıkanyń balalar kórkemsýret mektepteri tárbıelenýshileriniń úzdik dep tanylǵan dıplomdyq jumystarymen tanysty. Jas talanttar da ónerdegi óz jetistikterin ortalyq alańda kórsetýge múmkindik aldy.
Bir aıta keterligi, jyl boıy osy joba aıasynda ártúrli qalalar men óńirler óz jumystaryn usynyp shyqpaq. Aǵymdaǵy jyldyń ishinde Semeıden basqa Pavlodar, Shymkent jáne Ekibastuz qalalarynan kórkemsýret mektepteri balalarynyń qatysýy josparlanyp qoıypty.
Saltanatty rásimnen keıin atalmysh kitaphananyń alańynda daryndy balalardyń shyǵarmashylyq qyrlaryn ashatyn sheberlik-synyptar, plenerler, shyǵarmashylyq kezdesýler uıymdastyryldy. Alǵash bolyp, Semeı qalasy Balalar kórkemsýret mektebiniń pedagogi Jeńis Mukushevtiń sheberlik sabaǵy ótti.
Aıta ketken jón kórmede 70-ke jýyq, keskindeme, sándik-qoldanbaly jáne músin óneri boıynsha týyndylar usynyldy. Atalmysh kórme sońǵy úsh jyldaǵy mektep túlekteriniń úzdik dıplomdyq jobalarynan jınaqtalǵan oqýshylardyń shyǵarmashylyq tabystaryn ǵana emes, pedagogterdiń de kásibı jetistikterin kórsetti.
Mereı DILDABAEV
Sýretti túsirgen Orynbaı Balmurat