Prezıdent janyndaǵy Memlekettik basqarý akademııasynda Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵynyń uıymdastyrýymen «Qoǵamdyq kelisim jáne jalpyulttyq birlik salasyndaǵy memlekettik saıasat: júzege asyrý mindetteri men basymdyqtar» atty respýblıkalyq semınar-trenıng óz jumysyn bastady.
Jıynǵa Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýy aıasynda aıqyndalǵan jalpyulttyq birlik pen biregeılikti qalyptastyrý mindetiniń mánin ashyp kórsetý, Qazaqstannyń sıfrlyq ekonomıkasynyń demografııalyq jáne eńbek áleýetine taldaý jasaý ózek boldy. Sonymen qatar shara barysynda qoǵamdyq kelisim jáne jalpyulttyq birlik salasyndaǵy memlekettik saıasatty júzege asyrý tehnologııalary boıynsha tyńdaýshylardyń kásibı bilimi men biliktiligin arttyrý qarastyryldy.
Semınar-trenıngti ashqan Memlekettik basqarý akademııasynyń rektory Fatıma Jaqypova: «Qoǵamnyń kóptegen salalaryn strategııalyq ınnovasııalyq basqarý memlekettiń basty saıasatyna aınalyp otyr. Osyǵan oraı negizgi qyzmet memlekettik qyzmetkerlerge túsetini sózsiz. Elbasy «Táýelsizdik dáýiri» atty kitabynda memlekettik qyzmetkerler ult qyzmetshisi, patrıoty bolýy kerek ekenin atap kórsetti. Búgingi semınar-trenıngtiń basty maqsaty da – osy. Elbasy atap ótkendeı, memleket etnosaralyq jáne konfessııaaralyq úderisterdiń tamyryn dóp basyp, halyqaralyq qarym qatynastardy rettep otyrady. Iаǵnı Elbasy qurǵan saıasatymyzdyń 5 bazalyq qaǵıdatyn júzege asyratyn da memlekettik qyzmetshiler. Olaı bolsa, el birligin saqtaý isine barynsha belsene atsalysýymyz qajet», dedi.
Budan keıin baıandama jasaǵan QHA Tóraǵasynyń orynbasary Leonıd Prokopenko Qazaqstan Halqy Assambleıasynyń qoǵamdyq sanany jańǵyrtý men qazaqstandyq biregeılikti nyǵaıtý jolyndaǵy mindetterge toqtalyp ótti. «Halyqtardyń birligi men yntymaǵy - óte názik másele, sondyqtan oǵan baıyppen qaraýymyz kerek. Sońǵy ýaqytta bul kún tártibindegi basty másele bolyp otyr. О́ıtkeni, álemde bolyp jatqan ózgerister, jańashyldyq halyqtar arasyndaǵy qarym-qatynasqa tikeleı áser etedi. Osyǵan oraı Elbasy da óziniń sońǵy Joldaýyn da osy álemdik ózgeristerge arnady. Prezıdent bolashaqta 40 paıyzǵa jýyq mamandyq sıfrlandyrýdyń arqasynda qajet bolmaıtynyn atap ótti. Sonyń negizinde sıfrlyq ekonomıka, sıfrlyq orta paıda bolady. Sıfrlyq orta óziniń zańdylyǵymen júredi. Sondyqtan qazir ár ult, etnos óziniń ulttyq qundylyqtaryn saqtap qalý úshin, osy ortaǵa saı bolýy úshin barlyq múmkindikterdi qarastyryp jatyr. Eńbekke qabiletti bolý – bunyń basty sharty. Ol úshin bizge ekonomıkalyq, áleýmettik jáne rýhanı jańǵyrýdy bir mezgilde júzege asyrý qajet» dedi ol.
Semınar-trenıng barysynda Qazaqstannyń sıfrlyq ekonomıkasynyń demografııalyq jáne eńbek áleýetine taldaý jasaý, ıadrolyq qarýdy taratpaý men ıadrosyz álem qurýda Qazaqstan etnostarynyń áleýetin kórsetý, Qazaqstannyń saılaý júıesiniń ereksheligin kórsetý, BAQ máseleleri boıynsha zańnamadaǵy jańasha tásilderdi qarastyrý josparlanǵan.
Mádına JÁLELQYZY,
«Egemen Qazaqstan»