Maqanshy óńiriniń Qarabuta aýylynda «Týǵan jerge týyńdy tik» atty jerlester forýmy ótken bolatyn. Maqsat alysta júrgen aýyldastardyń týǵan óńirlerimen baılanysyn nyǵaıtyp, eljandy azamattardy aýylǵa bolysýǵa shaqyrý edi.
Negizi, bul úrdis aýylda burynnan qalyptasa bastasa da, sol baǵytty keńeıte tússek dedik. О́ıtkeni osy ortadan shyqqan azamattardyń demeýshiliginiń arqasynda aýyl ortasynda meshit, qatymhana salynyp, ortalyq saıabaq jóndelip, onda soǵys jáne eńbek ardagerleri men Analar qurmetine eskertkishter ornatyldy. Mine, týǵan aýyldarynyń tileýin tilep kele jatqan jomart jerlester forýmnyń «Aýyldyń áleýmettik-ekonomıkalyq damýyna qolyńnan kelgenshe qoldaý jasa» degen úndeýin de oń qabyldady. El aldynda berilgen ýádelerdiń aldy oryndala bastady. Atap aıtqanda, aýyldaǵy «Nur shýaq» balabaqshasy erekshe úlgidegi ulttyq oıynshyqtarmen qamtylyp, emhanaǵa arnalǵan teledıdar da jetkizildi.
Zamanaýı úlgidegi talapqa saı ulttyq oıynshyqtar «Jeti óner» seriktestiginiń ónimderi eken. Balany qoıyp, úlkenderdiń ózin qyzyqtyrǵan bul ónimder tek oıyn quraly ǵana emes, sanadaǵy ulttyq naqyshtardy jańǵyrtatyn, baldyrǵandardy baýyrmaldyqqa baýlıtyn tárbıe quraly ekenine kózimiz jetip otyr. Sáken Bolys esimdi kásipkerdiń avtorlyǵymen dúnıege kelgen «Keremet úı», «Keremet dombyra», «Maǵynaly oıýlar» atty oıynshyqtar toptamasynyń árqaısysynyń jeke nusqaýlyq kitapshalary bar. Nusqaýlyqtarda bala tilin damytý baǵytynda oıynshyq ataýlary taqpaq úlgisinde berilgen. Bul oıynshyqtardyń taǵy bir artyqshylyǵy – bir jáne birneshe balanyń ortaq qurastyrýyna arnalǵan. Mysaly «Keremet úıdiń» 6 keregesi, 20 ýyǵy, ózge de bólshekterimen birge úı ishine jınaıtyn turmystyq jabdyqtary bar, jıyny 20 buıymnan turady. Aldymen kıiz úıdi qurap, onyń ishine sandyq, tósek sekildi buıymdardy jınaı júrip, sábı sanasyna ulttyq órnekterdiń, sol tóńirekte tárbıeshiniń nemese ájesi aıtqan áńgimelerin tez ári tereń qabyldaıtyny anyq.
«Jeti óner» ónimderiniń eki jıyntyǵyn Sovet Shóshekov pen Serik Isa esimdi aýylymyzdyń maqtanyshyna aınalǵan kásipker azamattarymyz forýmda bergen ýádeleri boıynsha Almatydan arnaıy joldapty. «Qýantsań, balany qýant» degendeı, búldirshinderiniń qýanyshtan bal-bul janǵan júzderin kórgen saıyn ata-analary men tárbıeshiler keremet tartý jasaǵan aýyldas azamattarǵa alǵys aıtýda.
Sovet Shóshekov pen Serik Isa esimdi jerlesterimiz jerlester forýmyna da qur qol kelmeı, aýyldastar kádesine jarasyn dep qazaqtyń mańdaıaldy qalamgerleriniń týyndylarynan 100 kitap kótere kelipti. Bul kitaptar aýylymyzdaǵy mádenıet úıindegi kitaphanamyzdyń qazynasyn tolyqtyra tústi.
Muratbek SARQYTULY, Qarabuta aýyldyq okrýginiń ákimi
Shyǵys Qazaqstan oblysy,
Úrjar aýdany