Qaraǵandylyq tártip saqshylary aıaǵy aýyr ananyń ómirin saqtap qaldy. Polısııa qyzmetkerleri qyraǵylyq jáne ábjildik tanytpaǵanda, bul oqıǵanyń qaıǵyly jaǵdaımen aıaqtalýy ábden múmkin edi.
Sol kúni quramynda oblystyq jol-patrýldik polısııa batalonynyń vzvod komandıri, polısııa kapıtany Dáýren Ábdishev, aǵa leıtenant Maqsat Serikbaev jáne starshına Maqsat Smaılov bar ekıpaj ádettegideı qyzmettik mindetterin atqarýǵa kirisken bolatyn. Olar «Qaraǵandy-Pavlodar» tas jolyn betke alyp, Qaraǵandydan shyǵa bergende, qala shetindegi kóshelerdiń qıylysynda kenetten toqtaı qalǵan avtokólikti baıqap qalady. Oqıǵa bolǵan jerge jyldam jetip kelgenderinde kólikti júrgizip kele jatqan áıeldiń oryndyqtyń arqalyǵyn shalqasynan túsirip, qımylsyz jatqanyn kóredi. Kóliktiń ishinde, sondaı-aq, taǵy bir áıel men kishkentaı bala bolǵan.
Polısııa qyzmetkerlerine oılanyp jatýǵa ýaqyt az edi. Jedel qımyldaǵan olar esinen tanǵan áıeldi óz kólikterine kóterip ákelip jatqyzyp, jaqyn mańdaǵy aýrýhanaǵa qustaı ushady. Sóıtse, kólik júrgizýshi áıel dıabetpen aýyratyn bolyp shyqty, onyń ústine, qursaǵynda segiz aptalyq sharana bolǵan.
Bir qyzyǵy, álgi áıeldiń jaqyndary polısııa avtokóliginiń qaptaldaǵy nómirin este saqtap qalǵan da, izinshe Qaraǵandy oblystyq IID Jergilikti polısııa qyzmetiniń basshysy Jalǵasbaı Jaqaevtyń atyna qysyltaıańda kómek qolyn sozǵan tártip saqshylaryn marapattaýdy ótinip hat joldapty. Al óz mindetterine adal polısııa qyzmetkerleri kishipeıildik tanytyp, bul istegen jaqsylyqtaryn barynsha jasyrýǵa tyrysqan.
Qaırat ÁBILDA, «Egemen Qazaqstan»
QARAǴANDY