"Sportıng" - "Astana" matchy 3:3 esebimen aıaqtaldy. Oıynnan keıin qos komanda bapkerleriniń baspasóz máslıhaty ótti.
- Eń aldymen óz komandama rızamyn. Biz ekinshi oıyn aldynda eshqandaı maqsatsyz alańǵa shyqtyq. Alaıda, abyroımen óner kórsetip, ózimizdiń kelbetimizdi kórsettik. Birinshi taımda bir-eki múmkindigimizdi golǵa aınaldyrǵanymyzda onda «Sportıngti» tyǵyryqqa tireýge múmkindik bolatyn edi. Soǵan qaramastan bizdiń komandamyz Eýropa lıgasynyń pleı-off satysynda birshama jaqsy óner kórsete alatynyn dáleldedi.
- Búgingi oıynda kimdi úzdik dep atar edińiz? 90 mınýt boıy belsendi bolǵan Tomasovty ma, joq álde tarazy basyn teńestirgen Shomkony ma?
- Men bir eki oıynshyny belgilegim kelip turǵan joq. Gol soqqandardy maqtap otyrsaq onda ózgelerdi elemegenimiz. Marın de, Dıma da gol soqty,ekeýi de belsendi boldy. Al Abzal jaıly aıtar bolsam, ortalyq alań onyń pozısııasy emes. Degenmen ol meniń aıtqandarymdy buljytpaı oryndaıdy. Meniń oǵan taǵar esh kinám joq. Al jalpy komandalyq oıyndy jaqsartý úshin barlyq jartylaı qorǵaýshylardyń deńgeıin kóterýimiz kerek.
- Búgin ortalyq qorǵanysta Logvınenkonyń ornyna Postnıkov shyqty. Onyń sebebi nede?
- Anıchıch pen Postnıkov ekeýi birge kóp oınaǵan. Búgin ashyq oıyn ótip, qoǵanysymyzǵa jyldamdyq kerek ekeni anyq boldy. Sondyqtan da, Malyıdy emes Postnıkovty shyǵardyq.
- «Sportıngpen» ótken búgingi oıyn birinshi match bolǵanda, qalaı oılaısyz, «Astananyń» kelesi kezeńge ótetin múmkindigi bolar ma edi?
- Eger eki matchty 4 taımǵa bóletin bolsaq, biz sonyń bireýinde ǵana nashar oınaǵadyq. Qalǵanynyń bárinde biz qarsylastan kem túspedik. Sol aralyqta qarsylasymyz bizge qanjardaı qadalǵan goldar soǵyp tastady.
- Qazaqstan fýtbolynda negizgi kúshti legıonerler jasaıdy degenge kelisesiz be?
- Qazaq fýtbolyn tolyqtaı legıonerler kóterip tur desek te artyq qoı. Biraq, olarsyz biz Eýropa alańdarynda eshteńe isteı almaı kelemiz. Mysaly Qazaqstan Ulttyq quramasyn qarańyz, olar irikteý týrnırlerin 5-sebetten qaraıdy. Sondyqtan da, fýtboldyń shekarasy joq. Ol legıoner me, joq Qazaqstandyq fýtbolshy ma, onda turǵan eshteńe joq dep oılaımyn. Al dál qazir Qazaqstanda bul máseleden basqa mańyzdy sharýalar bar. Mysaly jasyl alańdar soǵý kerek jáne balalar fýtbolyn damytqanymyz durys. Al qalǵanynyń bári bos áńgime.
Ermuhamed Máýlen