О́skemendegi Jastar teatry ázirbaıjan dramatýrgi Ú.Ǵadjybekovtiń «Arshyn mal alan» mıýzıklin kórermen nazaryna usyndy.
Shyǵys dástúri boıynsha eki jas toıǵa deıin bir-birlerin kórmeı, úlkenderdiń aıtýymen úılenetin bolǵan. Bas keıipker Ásker qalyptasqan dástúrge qaramastan óz súıgenine qosylǵysy keledi. Dosy Súleımannyń keńesimen saýdager bolyp kıinip, ár úıge bas suǵyp, ózine qalyńdyq izdeıdi. Qala aralap, mata satyp júrip ózi saýdager, ózi bek Sultanbektiń qyzy Gúlchahraǵa jolyǵady, ǵashyq bolady. Osy jolda birshama qıyndyq pen kedergilerdi eńserip, sońynda súıgenine qosylady. Mıýzıkldiń oqıǵa jelisi osyndaı.
Mahabbat taqyrybyn ózek etken, án men bıge qurylǵan, eki bólimnen turatyn qoıylymdy sahnalaý úshin Grýzııadan rejısser kelipti. «Meni О́skemenge teatrdyń ádebıet bóliminiń meńgerýshisi Ulpan Toqaeva shaqyrdy. Qońyraý shalyp, «birlese jumys istesek qaıtedi?» degende, «komanda qandaı?» degen saýal qoıdym. Ylǵı jastar ekenin aıtqanda, qýana-qýana kelistim. Jalpy, mıýzıkldi kórip qana qoımaısyń, janyń rahattanady, demalasyń. «Arshyn mal alan» ázirbaıjan dramatýrginiń dúnıesi bolǵanymen, kóptegen halyqtarǵa ortaq tustary da kóp. Ári bul mıýzıkl arqyly jas akterlerdiń qarym-qabileti jan-jaqty ashyla túsedi. Menińshe, mıýzıkl kórermenderge unaǵan sekildi. Akterler óz rólderin sátimen alyp shyqty», - deıdi qoıylym rejısseri Gocha Hvıchıa.
Jastar teatrynyń akterleri О́skemendegi teatrlar arasynda mıýzıkl janrynda alǵash ret sahnalanǵan qoıylymǵa bar bolǵany bir aı ázirlengenin, az ýaqyt muǵdarynda shet eldik rejısserden kóp nárseni úırengenderin aıtady. «Eń áýeli eńbekqorlyqty úırendik. Kúnine 12-13 saǵattan tynbaı jumys istedik», - deıdi mıýzıkldiń bas keıipkeri Áskerdiń rólinde oınaǵan Aıdos Nurmaǵambetov. «Bul – bizdiń shet el rejıssserimen alǵash ret qoıan-qoltyq jumys isteýimiz. Múlde bólek rejıssýra, múlde bólek tehnıka deýge bolady. Gocha Hvıchıa ózge de memleketterde jumys istegen tájirıbeli rejısser eken. Barlyq bilgen, túıgenin bizge úıretýge tyrysty. О́zim jas bolsam da bas keıipker Ásker ǵashyq bolatyn Gúlchahranyń ákesiniń rólinde oınadym. Kórermen qaýym óz baǵasyn bere jatar», - deıdi qyzdyń ákesi Sultanbek saýdagerdiń rólin somdaǵan teatr akteri Edige Aqylbekov. Áskerdiń ǵashyǵy rólinde sahnaǵa shyqqan Dınara Juldyzqyzy mıýzıklde oınaýdy burynnan armandap júrgenin jetkizip: «Bul spektakldi stýdenttik kezden jaqsy kóretinmin. Armanym oryndaldy» dep lebizin bildirdi.
Azamat QASYM,
«Egemen Qazaqstan»
О́SKEMEN