Petropavl qalasynyń S.Muqanov atyndaǵy Soltústik Qazaqstan oblystyq kitaphanasy jańa kompıýterlik jabdyqpen jaraqtalady. Bul syılyqty Qazaqstan Respýblıkasy Tuńǵysh Prezıdenti - Elbasynyń Qory tartý etti.
Qazaqstan Respýblıkasynyń Tuńǵysh Prezıdentiniń Qory Qazaqstan óńirlerinde jastarmen belsendi jumys júrigizip otyr. 2017 jyldan bastap Qordyń ókilderi elimizdiń túrli qalalaryna baryp stýdentterdi Qordyń qyzmetimen jáne jastarǵa arnalǵan jobalarymen tanystyryp keledi.
Dástúr boıynsha jolsapar ákimdikte kezdesýmen bastalady. Petropavlda QR Tuńǵysh Prezıdenti - Elbasy Qorynyń Atqarýshy dırektory Qanat Jumabaev bastaǵan Qordyń delegasııasy, belgili ǵylym jáne óner salalarynyń ókilderi - Qor Syılyqtarynyń Laýreattary Soltústik Qazaqstan oblysynyń ákimi Qumar Aqsaqalovpen kezdesti. Resmı kezdesýde jastar baǵdarlamalaryn damytý máselesi, sondaı-aq mádenıet, ǵylym jáne áleýmettik saladaǵy birlesken jobalar týraly áńgime boldy.
Kezdesý barysynda Qor basshylyǵy S.Muqanov atyndaǵy Soltústik Qazaqstan oblystyq kitaphanasyna jańa kompıýterlik jabdyq alý úshin 3 mln teńge somasyna sertıfıkat tabystady.
Qazaqstan Respýblıkasynyń Tuńǵysh Prezıdenti – Elbasy Qorynyń Atqarýshy dırektory Qanat Jumabaev: «QR Tuńǵysh Prezıdenti Qorynyń josparynda jastardy qoldaýǵa, onyń negizin búgingi stýdentter men joǵary oqý oryndarynyń túlekteri quraıtyn jańa kreatıvti jáne básekege qabiletti qazaqstandyq ǵylymı qaýymdastyqty qurýǵa baǵyttalǵan kóptegen jobalar bar. Bul jobalardyń barlyǵy Prezıdenttiń Joldaýda qoıǵan mindetterine sáıkes ázirlenip iske asyrylady».
Ákimdikte kezdesýden keıin Qordyń basshylyǵy jáne ujymy M. Qozybaev atyndaǵy Soltústik Qazaqstan Memlekettik ýnıversıtetiniń (SQMÝ) ǵylymı jáne stýdenttik aktıvimen kezdesti, onda Qordyń jastarǵa arnalǵan jobalarynyń tusaýkeseri ótti.
SQM-niń jas ǵalymdary men stýdentteri Qordyń qyzmetimen tanys ekeni qýantarlyq. SQMÝ-niń 15 stýdenti Qordyń stıpendıaty atanǵan. Qordyń janynda qyzmet etetin Jas ǵalymdar keńesiniń sheshimi boıynsha SQMÝ-dyń Jas ǵalymdar keńesi «Úzdik jas ǵalymdar keńesi - 2017» ataǵyna ıe boldy. Dıplom Ýnıversıtettegi kezdesý kezinde tabys etildi.
Budan basqa, Qordyń ókilderi men áriptesteri stýdentterge arnalǵan sheberlik sabaqtaryn ótkizdi. Atap aıtqanda, QR Tuńǵysh Prezıdenti Qorynyń baspasóz qyzmetiniń basshysy Aqerke Berlibaı «Áleýmettik medıalar: SMM jáne PR-dyń sıfrlanǵan álemdegi úzdik is-tájirıbesi» taqyrybyna sheberlik sabaǵyn ótkizdi. QR Tuńǵysh Prezıdenti -Elbasy Qory Syılyǵy laýreaty - «Qazaqstannyń altyn vıoloncheli» Ermek Qurmanaev Petropavl óner kolledjiniń sýdentteri úshin sheberlik sabaǵyn ótkizdi, onda ol Petropavl óner kolledjiniń jas mýzykanttarymen óz tájirıbesimen jáne bilimimen bólisti.
Qazaqstan Respýblıkasy Tuńǵysh Prezıdenti - Elbasy Qorynyń Atqarýshy dırektory Qanat Jumabaev: «Aqparattyq tehnologııalar óskeleń urpaqqa jańa talaptar qoıý arqyly álemdik ekonomıkany ózgertedi.
Qazaqstan Respýblıkasy Tuńǵysh Prezıdentiniń Qory túrli IT-jobalardy iske asyrady, onyń ishinde «Smart Zholy», «Method PRO», búkilálemdik «Kodtaý saǵaty» aksııasyn qoldaıdy.
Bıyl Qor «Blokcheın» sıfrlyq marafony» jobasyn ázirledi. Qor blokcheın, krıptovalıýta, maınıng, ICO jáne basqa da zamanýı IT-trendter boıynsha qoǵamdyq alańdardy qurýdy josparlap otyr. Keleshekte osyndaı kezdesýler Qazaqstannyń túrli qalalarynda ótedi. Bizdiń maqsatymyz – halyqtyń, aldymenen jastardyń zamanýı IT-tehnologııalar boıynsha biliktiligin arttyrý. Osy maqsatta bizdiń áriptesterimiz, otandyq FinTech Group kompanııasynyń qyzmetkerleri Soltústik Qazaqstan Memlekettik Ýnıversıtetiniń stýdentteri úshin «blokcheın» tehnologııalaryna arnalǵan semınar ótkizedi.
Kúni buryn blokcheın boıynsha semınar Soltústik Qazaqstan oblysy ákimdiginiń qyzmetkerleri úshin ótkizilgen bolatyn. Tuńǵysh Prezıdent - Elbasy Qorynyń kúnderi N. Pogodın atyndaǵy Soltústik Qazaqstan orys drama teatrynda Qazaqstan operasynyń juldyzdary - Qor Syılyqtarynyń Laýreattarynyń gala konsertimen aıaqtalady. Petropavldyqtardyń aldynda: Gaýhar Tasbergenova (fortepıano), Bıbigúl Januzaq (soprano), Tatıana Vısınskaıa (messo-soprano), Azamat Jyltyrgózov (barıton), Marat Aıtimbaı (barıton), Bolat Esimhanov (bas) jáne Ermek Qurmanaev (vıolonchel) óner kórsetedi.