Búgin Energetıka mınıstrliginiń keńeıtilgen alqa májilisi ótti. Onda vedomstvo basshysy Qanat Bozymbaev baıandama jasady.
Qanat Bozymbaevtyń aıtýynsha, 4-munaı zaýytynyń qurylysyna qatysty naqty sheshim 2018 jyldyń ekinshi jartysynda qabyldanady.
«Memleket basshysynyń tapsyrmasyna sáıkes 4 munaı óńdeý zaýytynyń qurylysyna qatysty másele pysyqtalyp jatyr. Júrgizilgen saraptama tutynýdyń boljamdy ósimin eskergende avtomobıl benzınine tapshylyq 2021-2023 jyldary aralyǵynda, dızel otynyna 2023 jyly jáne avıakerosınge 2026 jyldan keıin qalyptasatyndyǵyn kórsetip otyr», - dedi Qanat Bozymbaev. Onyń aıtýynsha, Energetıka mınıstrliginiń basshylyǵymen «QazMunaıGaz» ulttyq kompanııasy 2018 jyldyń ekinshi jartyjyldyǵynda 4-shi munaı óńdeý zaýytynyń aldyn ala tehnıkalyq-ekonomıkalyq negizdemesin ázirleıtin bolady.
«Einshi jartyjyldyqta qurylystyń júrgizilý múmkindigi, ornalasatyn orny jáne zaýyttyń qýaty týraly naqty sheshim qabyldanady», - dedi mınıstr. Sonymen qatar Qanat Bozymbaev 2018 jyldyń ekinshi jartyjyldyǵynda janar-jaǵarmaı ónimderin eksportqa shyǵarýǵa múmkindik týatynyn aıtty.
«2017 jyldyń basty oqıǵasy Pavlodar men Atyraý munaı óńdeý zaýyttaryn rekonstrýksııalaý jáne jańǵyrtý jobalarynyń aıaqtalýy boldy. 2018 jyly Shymkent munaı óńdeý zaýytyn jańǵyrtýdy aıaqtaý josparlanǵan. 2018 jyly munaı óńdeý kólemi 1,1 mln tonnaǵa artyp, 16 mln tonnany quraıtyn bolady», - dedi mınıstr. Onyń aıtýynsha, elimizdiń jańǵyrtylǵan barlyq munaı óńdeý zaýyttary jobalyq qýatyna shyqqannan keıin 2018 jyldyń ekinshi jartyjyldyǵynan bastap ishki naryq munaı ónimderimen qamtamasyz etiledi. Benzınge, dızel otynyna jáne avıakerosınge táýeldilik joıylady. Tereń qaıta óńdeý kólemi 63-ten 83 paıyzǵa deıin artady. K4 jáne K5 ekologııadyq sanatyndaǵy ónimder shyǵarylady jáne janar-jaǵarmaıdy eksportqa shyǵarý múmkindigi týady.
«Ishki naryqta otandyq janar-jaǵarmaımen qamtamasyz etý benzın boıynsha 90, dızel otyny boıynsha 90 jáne avıakerosın boıynsha 70 paıyzdy quraıtyn bolady», - dedi ol.
Sondaı-aq Qanat Bozymbaev Qazaqstan benzın baǵasy arzan elderdiń reıtınginde 15-shi orynda turǵanyn aıtyp ótti.
«Global petroleum prices» halyqaralyq agenttigi álemdegi janar-jaǵarmaı baǵasy eń arzan elderdiń reıtıngisin jasaıdy. Atalǵan reıtıngti jasaý úshin joǵary oktandy benzın men dızel otynnyń baǵasyn paıdalanady. Atalǵan reıtıngte 167 eldiń derekteri qoldanylady. 2018 jyly 19 aqpanda jarııalanǵan reıtıngte birqatar memleket arasynda eń arzan benızın boıynsha Qazaqstan 15-shi orynda tur», - dedi mınıstr. Onyń dereginshe, elimizde 1 lıtr benzınniń baǵasy 56 sentti qurasa, álemde 1 lıtr benzınniń ortasha baǵasy - 1 dollar 15 sent. Eń arzan benzın Venesýelada, 1 lıtri 10 sentke teń. Al eń qymbat benzın 2 dollar 10 sent kóleminde Islandııada tirkelgen.
«Atalǵan reıtıngte Qazaqstan dızel otynynyń baǵasy boıynsha 14-shi orynda tur. Bizdegi dızel otynnyń baǵasy - 50 sent. Álemdegi dızeldik otynnyń ortasha baǵasy - 1 dollar 04 sent. TMD elderi boıynsha salystyrar bolsaq, onda bizge qaraǵanda eń arzan benzın Túrikmenstanda 0,43 sentti quraıdy. Dızel otyny da Túrikmenstanda jáne Ázerbaıjanda bizden arzan», - dedi Qanat Bozymbaev. Onyń aıtýynsha, 2018 jylǵy munaı óndirý jospary 87 mln tonnany quraıdy.
«2017 jyly 86,2 mln tonna munaı óndirilip, 2016 jylǵy deńgeıden 105 paıyzǵa ósim kórsetti. О́ndirýdiń eń joǵary kólemi Atyraý men Mańǵystaý oblystarymen qamtamasyz etildi. 2018 jylǵy munaı óndirý jospary 87 mln tonnany quraıdy», - dedi mınıstr. Onyń atap ótýinshe, 2017 jyly munaı óndirý kóleminiń ósimine Qashaǵan, Teńiz jáne Qarashyǵanaq ken oryndaryndaǵy turaqty eselenýmen baılanysty. 2018 jyly da Qashaǵan esebinen negizgi ósim bolady dep kútilýde.
«Qashaǵannan munaı óndirý jospary 11 mln tonnany quraıdy. Bul rette Qyzylorda men Aqtóbe oblystaryndaǵy ken oryndarda óndirý kóleminiń tómendeıtindigi kútilýde. Bul atalǵan ken oryndarynyń tabıǵı tozýymen ázirlemeler kezeńiniń kesh bastalýymen baılanysty», - dep túsindirdi ol. Mınıstr dereginshe, 2017 jyly 69,8 mln tonna munaı eksportqa shyǵaryldy.
«2016 jyly Brent markaly munaıdyń ortasha baǵasy 45, 2017 jyly shamamen 54 dollardy qurady. 2018 jylǵy boljam barreline shamamen 55-60 dollar bolady dep kútilýde. 2017 jyldyń 30 qarashasynda OPEK+ qatysýshylarynyń keńesinde 2018 jyldyń sońyna deıin munaı óndirýge qoıylǵan shekteýdi sozýǵa ýaǵdalasty», - dedi Qanat Bozymbaev.