«Imstalkonnyń» aıaǵynan tusaý alyndy

Maqalada eń alǵashqy ózara keli­sim­shartta naqty kórsetilgenine qara­mastan belgili bir ýaqyt ishinde bank bastapqydaǵy 11 paıyzdyq syıaqy mólsherin eshbir suraýsyz birden 18 paıyzǵa kóterip jónsiz áreketke barǵany aıtylady. Bul arada reseılik bank qazaqstandyq kompanııany kúshtep bolsa da óz ıeligine alýdy maqsat etip otyrǵanyn jasyrmaıdy da. Is sotqa túsken. Istiń reseılikterdiń múddesin qorǵaý jaǵyna burylyp bara jatqanyn baıqaǵan óndiristegi barlyǵy 9000 jumysshy shyn máninde osy merzimde ári-sári kúı keshýge májbúr edi.

Sol tusta «Imstalkon» AQ bas dırektory Mıhaıl Rezýnov: «Biz ózimizdiń qazaqstandyq qýat­ty kásipornymyzdy, táýel­sizdigimizdiń qurdasy – ulttyq tól kompanııamyzdyń ǵumyryn abyroımen saqtap qalýǵa bar kúshimizdi salamyz. Bank bizge eń bolmasa ústeme nesıeni qaıtarý mezgilin shartta kórsetilgen 2019 jylǵa deıin sozdyryp berse de jetkilikti. Reseılikterge alǵan nesıeni tolyǵymen qaıtarýǵa shamamyz jetedi. Olardyń zańdy belinen basyp ústeme paıyzdy joǵarylatýy eshqandaı aqylǵa syımaıdy», dep qalyptasqan ahýalǵa oraı jazǵan hatynda redaksııa tarapynan qazaqstandyq quzyrly organdardy qulaǵdar etip, olardan tez arada arashaǵa túsýin ótingen.

Arada tartysty 1 jyl 6 aı ýaqyt ótipti. Osy merzim ishinde «Ims­tal­kon» AQ ústinen tapsy­rylǵan shaǵymǵa oraı Almaty qalalyq soty men Almaty mamandandyrylǵan aýdan­ara­lyq ekonomıkalyq soty, sondaı aq, Joǵarǵy sot barlyǵy 9 ret is qarapty. Qorytyndysynda barlyq sottyń sheshimi bir – osy iske baılanysty bank tarapynan ýaqytsha qurylǵan saýyq­tyrý basqarmasynyń «óndiris orny ban­krot bolýǵa tıis» degen sheshimi negizsiz dep tabyldy. Osyǵan oraı «Imstalkon» AQ bastapqy jumys yrǵaǵyna qaıta oralyp, qazirgi tańda bolashaqta atqaratyn jumys aýqymyn anyq­tap alý sharalarymen aına­lysýda. Sot sheshiminen soń «Imstalkon» kompanııasy ýa­qytty kesheýildetpeı Qazaqstan Respýblıkasynyń Úkimetine óndiristik mańyzdaǵy ótinish tap­syrdy. Onda bylaı dep kórse­tilgen: «Imstalkon» AQ alda­ǵy eki jyl ishinde Úkimetten jeńildikpen demalys surap, sol arqyly depozıt shot esebin ashyp, árbir jınaq kassasynan túsken qarajat mólsherin der kezinde Úkimet ıeligine jiberip otyrady. Jınalǵan qarajat birneshe bankke shashylmaı, bir ortalyqqa – Úkimet belgilegen bir bankke aýdarylady».

Qazirgi tańda aksıonerlik qoǵamnyń Úkimet aldynda barlyq salyq túrinen eshqandaı da qaryzy joq. Sondaı-aq kompanııa turaqty kepildeme retinde óziniń 50 paıyz aksııasyn Úki­metke berýge ázir. Osyǵan oraı «Imstalkon» «Báı­terek» qo­rynda alǵashqy tusaý­keserin ótkizdi. Aksıonerlik qoǵam­nyń bul qadamdary Prezıdent Nur­sultan Nazarbaevtyń 2018 jylǵy 10 qańtardaǵy «Tórtinshi ónerkásiptik revolıýsııa jaǵ­daıyndaǵy damýdyń jańa múm­kindikteri» atty Qazaqstan hal­qyna Joldaýyn júzege asyrý talaptaryna tolyqtaı jaýap beredi. Jalpy, ulttyq jos­par aıasyndaǵy atqarylyp jat­qan sharalarǵa Úkimettiń der kezinde qoldaý kór­setýi bul iske oń áserin tıgiz­geni anyq.

Qalyptasqan sońǵy ahýalǵa saı «Ims­talkon» kásipornyn retsiz qys­paqqa alǵan reseılik «Sberbank» pen «Al­fabank» qazaqstandyq óndiris ornyna 40-50 paıyzǵa deıin tómen­detý dıskontyn berýge daıyn ekendikterin bildirdi. Qazaq­standyq «Imstalkon» aksıo­nerlik qoǵamynyń aınala­synda 2015 jyldyń 15 qazanynan bastalǵan dúr­beleń osymen tolyq aıaqtaldy deýge tolyq negiz bar. Osyǵan oraı «Ims­tal­kon» AQ dırektorlar ke­ńesiniń tór­­aǵasy Halel Tóre­ǵalıev búgingi óndi­ris­tik ahýalǵa bylaısha tujyrym jasady:

– Eń aldymen otandyq óndiris ornynyń basyna is túsip, jaǵdaı ýshyq­qan tusta arasha bolyp, kompanııanyń tyǵyryqqa tirelý sebepterin meılinshe aıǵaqtap, istiń aqıqatyn ashyp jazǵany úshin «Egemen Qazaqstan» gaze­tiniń redaksııasyna alǵys aıtamyz. Basylymdaǵy ótkir maqa­ladan soń elimizdiń Úkimeti, Úkimet basynda otyrǵan birqa­tar laýazymdy azamattar bul máseleni birden nazaryna aldy. Sot isiniń ádil sheshimin tabaryna bárimiz de sendik. Sot ádil sheshimin shyǵardy da. Qazirgi tańda Úkimet senimine ıe bolǵan otandyq óndiris orny eń aldymen aldaǵy ýaqytta atqaratyn jumys aýqymyn josparlap aldy. Onyń bir mysaly, Qazaqstan aýmaǵynda qonys tepken amerıkalyq «Shevron» jáne halyqaralyq «Eýrohım» kompanııalarymen uzaq merzimge kelisimshartqa otyrdy. Endigi isteletin jumys bir ǵana baǵyt­ta júredi, ıaǵnı kompanııa basyna qıyn is túskende der kezinde kómek qolyn sozǵan Qazaq­stan Úki­metine tıesili qaryz-qarajatty belgi­lengen mer­zimde qaıtarady, qazir onyń merzimi anyqtalý satysynda. Ujymdyq qurylymnyń ishki bólimshe­lerinde birshama aıyq­tyrý-saýyqty­rý, óndiristik tártipti jańasha qalyptas­tyrý sekildi naqty sharalar muqııat júr­gizilýde. Turaqty eńbek ahýa­lynyń ornyqqanyn sezingen eńbek ujymy jańasha talpynys­pen jumys isteýde.

Talǵat SÚIINBAI,

«Egemen Qazaqstan»

ALMATY