О́tkende ǵana Taldyqorǵan qalasy turǵyndarynyń sany jyl saıyn artyp kele jatqanyn jazǵan edik. Oblys ortalyǵyna qonystanýshylardyń kóbeıýi qaladaǵy áleýmettik nysandardyń qyzmetin tutynatyn adamdar úlesiniń ósýine ákeletinin aıtqanbyz. Ásirese mektep jasyndaǵy balalar sanynyń artýy jalpy bilim beretin oshaqtar qatarynyń jetispeýshiligin sezdirip otyr.
Oblysta jalpy bilimmen qamtýǵa, onyń ishinde zaman talabyna saı bilim beretin ǵımarattar salýǵa erekshe kóńil bólinip otyr. Máselen, óńirdegi apatty mektepterdiń ornyna jańasyn salý men úsh aýysymdy oqytý máselesin sheshý kún tártibinde tur. Osy maqsatta ótken jyly 47 bilim berý nysanyn salýǵa jáne jańǵyrtýǵa 26 mlrd teńge bólingen eken. Onyń ishinde jalpy quny 5,2 mlrd teńgeni quraıtyn 24 ǵımarat tolyqtaı kúrdeli jóndeýden ótkizildi. Munyń kóbisi oblystyń halyq molynan qonystanǵan aýdandarda júzege asqan. Al oblys ortalyǵyndaǵy suranysty óteýge bólingen qarjy tolyqtaı ıgerilip, nátıjesinde salynǵan ǵımarattar merziminde qoldanysqa berilip otyr. Mysalǵa, aldaǵy jańa oqý maýsymynyń bastaýynda Taldyqorǵan qalasynda shyt jańa mýzyka mektebi jáne árqaısysy 1200 oryndyq eki jańa mektep oqýshylarǵa esigin aıqara ashpaqshy.
Jaqynda oblys ákimi Amandyq Batalov qurylysy qyzý júrip jatqan bilim oshaqtaryndaǵy jumys barysymen arnaıy baryp tanysty. Aralaý kezinde óńir basshysy ár nysanǵa qatysty eskertpelerin aıtyp, atqarylyp jatqan jumystardyń sapasyna basa nazar aýdarýdy tapsyrdy. Oblys ortalyǵyndaǵy 300 oryndyq mýzyka mektebi jańa Ońtústik-Batys turǵyn aýdanynda ornalasqan. Eki qabatty mektep ózine ǵana tán sáýlettik sheshimimen erekshelenedi, ǵımarattyń keıpi amfıteatrǵa uqsas, 200 orynǵa arnalǵan jeke konsert zaly bar. Nysandaǵy jumystar kestege sáıkes júrgizilýde. Jáne osy shaǵyn aýdan aýmaǵynda 1200 oryndyq jalpy bilim beretin mekteptiń de qurylysy júrip jatyr. Qurylys basyna kelgen Amandyq Batalov aýmaqty abattandyrýdaǵy kemshilikterge, ǵımaratqa qoıylǵan jeldetkish shilterdiń, karnızderdiń sapasyna qatysty syn-eskertpelerin aıtyp, qajet jaǵdaıda aýystyrýdy tapsyrdy.
Al 1200 orynǵa arnalǵan taǵy bir mektep oblys ortalyǵynyń soltústik-batys aýdanynda salynýda. Bas merdigeri – «Melior Logistik» kompanııasy, jobalaýshysy – «Arlan-Joba Qurylys» JShS. Bul bilim nysanynyń qurylysy shilde aıynda aıaqtalýy tıis. Qazir ishki árleý jumystary júrip jatyr. Osy saparynda oblys ákimi mekteptiń qasbeti túsiniń qandaı bolatynyn naqtylap berip, sol sııaqty tańdalǵan ishki esikterin, jaryq shamdary men eden tósenishterin kórip, maquldady.
Osy úsh nysannyń da salynyp bitetin merzimi shilde aıy dep josparlanyp otyr. Bilim kúninde bul bilim oshaqtary óziniń alǵashqy tárbıelenýshilerin qabyldamaq.
Sondaı-aq óńir basshysy Taldyqorǵan qalasynyń aýmaǵynda salynyp jatqan kottedj qalashyǵyn da nazardan tys qaldyrmady. Onda qazir tórt bólmeli 48 páterden turatyn, jalpy alańy 5,8 myń sharshy metr bolatyn 12 kottedj ǵımaraty salynyp jatyr. Aralaý barysynda aıtylǵandaı, jyl sońyna deıin jalpy quny 2,4 mlrd teńge bolatyn 202 páterli 166 kottedj turǵyzý kózdelgen. Oblys basshysy Amandyq Batalov kottedjdi qalashyq aýmaǵynda sham baǵanalaryn aýystyrýdy eskertti. Osy aralaý barysynda ákim bıylǵy jyldyń qyrkúıek aıynda paıdalanýǵa beriletin jańa drama teatryna da soǵyp, árleý jumystarynyń barysyn kórdi.
Sondaı-aq bul kúni Taldyqorǵan qalasynyń ákimdigi oblys basshysyna turmystyq qatty qaldyqtardy suryptap jınaýǵa arnalǵan qoqys jáshikteriniń zamanaýı úlgilerin tanystyrdy. Ázirge «Qaratal» shaǵyn aýdanyndaǵy alańdardyń birine 2 zamanaýı qoqys jáshigi qoıylǵan. Onyń birine plastık, shyny, metall, qaǵaz, polıetılen, aǵash sııaqty qurǵaq qoqys jınalsa, ekinshisine dymqyl, ıaǵnı organıkalyq jáne taǵam qaldyqtary salynady. Mamyr aıynda qala boıynsha qoıylatyn osyndaı qoqys jınaıtyn oryndardyń sany júz elýge jetpek. Amandyq Batalov jańa konteınerlerdi ornatýmen qatar qurǵaq jáne dymqyl qaldyqtar dep suryptap tastaý qajettigin turǵyndarǵa túsindirý kerektigin aıtty.
Nysandardy aralaýdan keıin oblys ákimi salynyp jatqan árbir nysannyń eń aldymen sapasyna basa nazar aýdarý qajettigin, usaq-túıekke deıin erekshe mán berýdi tapsyrdy.
– Turǵyzylyp jatqan nysandardyń aınalasyn kórkeıtý jumystary nazardan tys qalmaýy kerek, sol sııaqty shaǵyn sáýlettik formalar ornatylýy tıis, jáne olardyń árqaısysy jańa nysandy tolyqtyryp, aıshyqtap, ashyp turatyndaı bolýy qajet, – dedi Amandyq Batalov.
Qalmahanbet MUQAMETQALI,
«Egemen Qazaqstan»
Almaty oblysy