Máńgilik qazyna

Keshe Almatyda Ortalyq memlekettik muraǵatynyń 90 jyldyǵyna arnalǵan «Muraǵattar. Elimizdiń mádenı murasyn saqtaýdaǵy orny men qyzmeti, tarıhy» atty konferensııasy ótti. Sondaı-aq jıyn aıasynda uıymdastyrylǵan respýblıka Ulttyq muraǵat qory qujattarynyń kórmesindegi sırek kezdesetin qundy  jádigerler kelýshilerdiń qyzyǵýshylyǵyn týǵyzdy.

Tarıh paraǵyna kóz jibersek, 1921 jyly qyrkúıek aıynda Torǵaı jáne Orynbor gýbernııalarynyń mekemeleri men uıymdarynyń qujat­tary negizinde Orynbor qalasynda Ortalyq ólkelik muraǵat qurylyp, onyń qalyptasýyna kórnekti memleket qaıratkeri S.Seıfýllın atsa­lys­qan. Sodan bergi 90 jyl ishinde mu­raǵat elimizdegi ǵylymı jáne mádenı mańyzy bar iri tarıhı qujattyq derekkózderin jınaýshy  mol muraǵa aınalyp otyr.

Ortalyq memlekettik muraǵa­ty­nyń bas dırektory Lázzat Aqtaeva­nyń aıtýynsha, búginde muraǵat qoı­malarynda keńes dáýirine deıingi, keńestik jáne táýelsiz Qazaqstan kezeńderiniń mekemeleri men uıym­darynyń, jeke tulǵalar kolleksııa­synyń  1,5 mıllıonǵa jýyq qujat­tary jınaqtalǵan.

– Búgingi jańalyǵymyz –  konferensııa aıasynda ótken «Jaýhar já­digerler» kórmesine sońǵy ýaqytta shetelden alynǵan qundy muraǵat qu­jattary men kóshirmeleri qoıyldy. Olar – «TÚRKSOI» basshysy D.Qa­seıinov pen Túrkııa azamaty Mýzaffer Akchoranyń Alash arysy M.Sho­qaıdyń syı retinde tapsyrǵan hattary, sonymen qatar memlekettiń Arab qoljazbalar ınstıtýtynan (Mysyr), HH ǵasyrdyń basynda ómirge kelgen Jambyl oblysynyń týmasy, Egıpet Arab Respýblıkasy­nyń azamaty Nasrýlla At-Tarazıdiń jáne Reseı memlekettik tarıhı mu­ra­ǵatynan alynǵan qujattar qoıyl­dy, – dedi Lázzat Súleımenqyzy.

Elimizdiń muraǵatshylarynyń qara shańyraǵy óziniń 90 jyldyq tarıhynda  ártúrli kezeńderdi bastan ótkizgenin, tipti daǵdarys jyldary búkil muraǵat, murajaılarymyz qa­ra­jatsyz qalǵanda tek yntaly mamandar arqyly ózimizdiń qajetti mu­ramyzdy, qundy derekter men qu­jattardy saqtap qalǵanymyzdy jetkizgen Baılanys jáne aqparat mınıstrligi Aqparat jáne muraǵat komıtetiniń tóraǵasy Bolat Bersebaev muraǵattyń búgingi jaǵdaıyna, al­daǵy atqarylatyn is-sharalarǵa toqtaldy.

– Endigi mindetimiz qoldaǵy bar   ba­zalar, muraǵattardyń qoryn ny­ǵaı­tý, keńeıtý. Ekinshi baǵytymyz, barlyq qujattardy, qorlardy san­dyq formatqa  kóshirý. О́ıtkeni, kez kelgen maman qajetti tarıhı derekterdi izdeıdi ǵoı. Máselen ol tek Batys Qazaqstan oblystyq muraǵa­tyn­da bolsa,  3 myń shaqyrymǵa barý úshin qarajat, ýaqyt kerek. Son­dyqtan zertteýshilerge, stýdentterge yńǵaıly jol tabý maqsatynda  ja­ryq kórýge ruqsat berilgen qujat­tar­dy ınternetke salsaq degen jos­parymyz bar. Ol   biz úshin aýqymdy jumys. Oǵan da ýaqyt, qarajat kerek. Úkimet basshylary  tarıhı, má­de­nı, rýhanı qazynamyzdy  saqtap qana emes, olardy ashyq túrde aza­mattarymyzǵa, zertteýshilerge, jas mamandarǵa qoljetimdi etýdi túsinip, qoldap otyr. Osylaısha,   ár aımaqtaǵy muraǵattardy ortalyq­tan­dyryp, ıntegrasııa jasaımyz dep otyrmyz, – dedi tóraǵa.

Sondaı-aq konferensııada qoǵamnyń áleýmettik-mádenı salasyndaǵy muraǵattyń orny men qyzmeti, muraǵat ǵylymı-zertteýlerdiń derekkózderi, t.b. qadaý-qadaý máseleler jaıly ǵalymdar, mádenıet qaıratkerleri, muraǵat qyzmetkerleri baıandamalar jasap, pikirlerin ortaǵa saldy.