Medǵat – talantty jas. Mańǵystaý oblystyq N.Jantórın atyndaǵy mýzykalyq drama teatrynyń irgetasyn qalaýshylardyń biri, «Daryn» memlekettik jastar syılyǵynyń laýreaty, «Eńlikgúl-2016» kásibı syılyqtyń «Jyldyń eń úzdik akteri» atalymy boıynsha ıegeri, talantty teatr jáne kıno akteri Medǵat О́mirálıev qazaqstandyq kınorejısser Murat Bıdosovtyń «Tar zaman» atty fılmine tústi. Alashordanyń 100 jyldyǵyna arnalǵan kınokartınada ol Álıhan Bókeıhannyń beınesin somdady.
Fılm ulttyq memleket quramyz dep, óz ýaqytynan oza shapqan tulǵalarǵa arnalady. Oqıǵa jelisi Alashorda úkimetin qurý jolyndaǵy ortaq muratqa toptasqan alash zııalylarynyń ómirinen qurylady. Basty keıipkerdiń biri Álıhan Bókeıhannyń tartysqa toly dramalyq kezeńi sýretteledi. Onyń el úshin kúresken eńbegi, aınalasyna toptalǵan tarıhqa belgili tulǵalarmen baılanysy, kózqarasy men ustanymy, mahabbaty men taǵdyry kórkemdik sheshimdermen óriledi. Alashorda úkimetin qurý jolynda kúresken Mustafa Shoqaı, Ahmet Baıtursynuly, Mirjaqyp Dýlatov, Smaǵul Sádýaqasov syndy tulǵalardyń da kórkem obrazdary kórinis tabady. Alashorda úkimetin qurý barysyndaǵy tartysty pikirler men eki topqa bólingen alash zııalylary arasyndaǵy saıası qarym-qatynas, satqyndyq, múddeler qaqtyǵysy da kórsetiledi. Omby men Semeıdegi oqıǵalar, Alash áskeriniń qurylýy, Stalınniń Álıhandy Máskeýge aldyrtýy, abaqtydaǵy tergeý isteri qamtylady. Álıhannyń alash jurty ustanýǵa tıisti bes ustanymy tóńiregindegi amanat oılarymen túıindeledi, deıdi uıymdastyrýshylar.
12 bólimnen turatyn telehıkaıa Almaty oblysy, Jambyl oblysy, Pavlodar qalasynda eki jarym aı túsirildi. «Qazaqstan» ulttyq telearnasynyń arnaıy jobasy bolyp tabylatyn «Tar zaman» telehıkaıasynyń tolyqmetrajdyq nusqasy bıyl 23 aqpan kúni Qazaqstannyń barlyq kınoteatrlarynan qalyń kórermen nazaryna usynylǵan bolatyn. Aldaǵy ýaqytta telehıkaıa «Qazaqstan» ulttyq telearnasynyń qoryna enip, qazaqstandyq kórermenderge kórsetiledi dep josparlanýda.
– Tarıhı týyndy túsirilmeı turyp men ózimizdiń N.Jantórın teatrynyń sahnasynda ult kósemi Álıhan bastaǵan alash zııalylarynyń asqaq rýhtaryna jáne Alashordanyń 100 jyldyǵyna arnalǵan Nartaı Saýdanbekulynyń «Álıhannyń amanaty» atty spektaklinde Álıhan Bókeıhannyń beınesin somdaǵan bolatynmyn. Sondyqtan bolar, rejısser Álıhan Bókeıhannyń rólin maǵan berýdi uıǵardy. Bul týyndy halyqtyń kóńilinen shyǵady degen úmittemiz, – deıdi M.О́mirálıev.
Al, kınorejısser Murat Bıdosov bolsa, «Men osydan eki jyl buryn «Aqyldyń kilti, О́mirdastan» atty tarıhı teleserıaldy túsirgen kezde Medǵattyń akterlik sheberligimen birge fızıkalyq turǵydaǵy shıraqtyǵyna kóz jetkizdim. Túsirilim barysynda ózine júktelgen mindetke asa jaýapkershilikpen qarap, obrazdy jan-jaqty ári shynaıy oınaýǵa baryn salatyn. Sol kezde óziniń aldyndaǵy aǵa býyn akterlermen, izin basyp kele jatqan inilerimen túsirilim barysynda róldi joǵary deńgeıde oryndaýǵa básekelesip, ashyq-jarqyn minezimen de kózimizge tústi. Jalpy, akterdiń syrtqy faktýrasymen birge ishki jan dúnıesi, oı-óresi teń bolmasa qos qanatyn keńge jaıyp, alysqa samǵaı alýy ekitalaı. Bul turǵydan Medǵattyń qos qanaty teń dep aıtar edim. Akterdiń osyndaı sergektigi, tereńdigi, jumysqa degen jaýapkershiligi kez kelgen rejısserge jaqsy áser qaldyratyny anyq», deıdi akter týraly.
Buǵan deıin «Káýsar», «Kúlásh», «Qyz joly», «О́geı júrek», «Aqyldyń kilti-2» «Balýan Sholaq» syndy 10-ǵa jýyq otandyq fılmderge túsip úlgergen M.О́mirálıevtiń teatr jáne kıno áleminde alar asýy bıik dep esepteımiz.
Alfııa QAZAQBAI,
N.Jantórın atyndaǵy mýzykalyq-drama teatry ádebıet bóliminiń meńgerýshisi
Mańǵystaý oblysy