Qasym-Jomart Toqaevtyń tóraǵalyq etýimen Parlament Senatynyń otyrysy boldy, dep habarlaıdy QR Parlamenti Senatynyń Baspasóz qyzmeti.
Senatorlar 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýy týraly 2014 jylǵy 23 jeltoqsanda qol qoıylǵan sharttyń jekelegen erejelerin qoldaný týraly hattamany ratıfıkasııalady.
Qujattyń negizgi maqsaty EAEO memleketteriniń bajdardy bólýdegi birdeı tásilin qamtamasyz etý jáne múshe elder úshin kedendik ákelý bajdarynyń somalaryn bólý normatıvterin qaıta qaraý bolyp tabylady. Hattamany ratıfıkasııalaý birdeı tásildi jáne EAEO memleketteriniń bıýdjetterine bajdardy turaqty bólý men esepke jatqyzýdy qamtamasyz etýge múmkindik beredi.
Eýrazııalyq ekonomıkalyq odaqqa múshe memleketterdiń ónerkásiptik taýarlarǵa qatysty ózindik erekshelikti sýbsıdııalardy Eýrazııalyq ekonomıkalyq komıssııaǵa erikti kelisý jáne EAEO-ǵa múshe memleketterdiń ózindik erekshelikti sýbsıdııalardy berýine baılanysty talqylaýlardy EAEK júrgizý tártibi týraly kelisim ratıfıkasııalandy.
2017 jylǵy 26 mamyrda Qazan qalasynda qol qoıylǵan kelisim Eýrazııalyq ekonomıkalyq odaqqa múshe memleketterdiń ekonomıkasyn turaqty ári tıimdi damytý úshin jaǵdaıdy qamtamasyz etýge, Eýrazııalyq ekonomıkalyq odaqqa múshe memleketterdiń arasynda ózara saýda jáne adal básekeni damytýǵa járdemdesýge arnalǵan.
Qujat Eýrazııalyq ekonomıkalyq odaqqa múshe memleketterdiń jáne Eýrazııalyq ekonomıkalyq komıssııa arasyndaǵy ónerkásip taýarlaryna qatysty ereksheligi bar sýbsıdııalardyń berilýine baılanysty quqyqtyq tetikterdiń ózara is-qımylyn retteıdi. Eýrazııalyq ekonomıkalyq komıssııanyń ózindik ereksheligi bar sýbsıdııalardy múshe memleketterge berilýiniń erikti kelisý tártibi, sondaı-aq Komıssııanyń ózindik erekshelikti sýbsıdııalardyń múshe memleketterge berilýine baılanysty talqylaýlardy júrgizý tártibi retteldi.
Kelisim Komıssııanyń qabyldanǵan sharttarǵa baılanysty ereksheligi bar sýbsıdııalarǵa qol jetkizý nemese qol jetkizýge bolmaıtyny týraly sheshimderdi qabyldaý tártibin bekitedi. Qol jetkizý sharttary Qazaqstan Respýblıkasyndaǵy qazirgi sýbsıdııalaý tájirıbesine saı keledi. Komıssııa basqa múshe memleketter bergen ereksheligi bar sýbsıdııalarǵa qatysty, egerde ulttyq ekonomıka salasyna zııany týraly dálel bolǵan jaǵdaıda talqylaý júrgizýge haqy bar.
Teńiz keme qatynasy qaýipsizdigine qarsy baǵyttalǵan zańsyz is-árekettermen kúres týraly konvensııaǵa 2005 jylǵy hattama ratıfıkasııalandy.
Teńiz keme qatynasynyń qaýipsizdigine qarsy zańsyz is-árekettermen kúres týraly 1988 jylǵy negizgi konvensııany Qazaqstan 2003 jyly ratıfısııalaǵan bolatyn.
2005 jyly qazanda Londonda Halyqaralyq teńiz uıymynyń zańsyz is-árekettermen kúres týraly sharttardy qaıta qaraý jónindegi konferensııasynda Teńiz keme qatynasynyń qaýipsizdigine qarsy zańsyz is-árekettermen kúres týraly konvensııaǵa hattamaǵa qol qoıyldy.
Hattama teńiz kemelerine terrorlyq shabýyldardyń jıileýine baılanysty halyqaralyq terrorlyq aktilerdiń aldyn alý jáne boldyrmaý úshin halyqaralyq qoǵamdastyqtyń kúsh-jigerin kúsheıtýge shaqyrady.
Qujat Konvensııaǵa halyqaralyq teńizdegi keme qatynasynda halyqaralyq terror aktilerin boldyrmaýǵa jáne odan qorǵalýyna qatysty, sondaı-aq Konvensııanyń tıimdiligin arttyrýǵa baǵyttalǵan ózgerister men tolyqtyrýlardy engizýdi kózdeıdi.
Odan basqa qujatta laýazymdy jáne zańdy tulǵalardyń qylmystyq, ákimshilik, azamattyq-quqyqtyq jaýapkershiligi, sondaı-aq qatysýshylardyń aqparatty berý salasyndaǵy tyǵyz yntymaqtastyǵyn retteý týraly erejeler bar.
Otyrys barysynda senatorlardyń depýtattyq saýaldary jarııa etildi. Senator Darıǵa Nazarbaeva – elimizdiń bank sektorynyń memleket tarapynan qoldaý baǵdarlamasyn iske asyrýǵa qatysty; Murat Baqtııaruly – qazaq tilin latyn álipbıinde oqytý jáne ony nasıhattaý týraly; Manap Kóbenov – aýyl sharýashylyǵy óndirisindegi kooperatıvteri; Ańsar Musahanov – zilzala máseleleri týraly; Ǵumar Dúısembaev – «Oral «Zenıt» zaýyty» AQ-na memlekettik tapsyrys berý týraly; Sársenbaı Eńsegenov – memlekettik-jekeshelik áriptestik jobalaryn iske asyrý jáne kompozıtor Qurmanǵazynyń 200 jyldyǵyn merekeleý týraly; Erik Sultanov –Petropavl qalasynyń turǵyn úı-kommýnaldyq sharýashylyǵy týraly; Nurjan Nursıpatov – elimizdiń Qarýly Kúshterin, basqa da áskerler men áskerı qurylymdardy qarjylandyrý qajettigi; Bekmyrza Elamanov – Qyzylorda oblysyndaǵy avtomobıl joldaryn jóndeýdi, mektepter men ınfraqurylymdar qurylysyn qarjylandyrý týraly; Narıman Tóreǵalıev – «Memlekettik satyp alýlar týraly» zań aıasynda tenderge qatysatyn otandyq kásiporyndardy qoldaý týraly saýal joldady.