Sh.Aımanov atyndaǵy «Qazaqfılm» kınostýdııasy TMD elderi arasynan birinshi bolyp Azııa-Tynyq muhıt aımaǵyndaǵy kınoóndirýshiler federasııasynyń múshesi atandy. Kınostýdııanyń federasııa quramyna kiretini týraly sheshim basqarma músheleriniń Beıjińde ótken «Azııa-Tynyq muhıt aımaǵyndaǵy elderdiń kıno salasyndaǵy birlesken yntymaqtastyǵy – 2018» atty H sezinde aıtyldy.
Azııa-Tynyq muhıt aımaǵy kınoóndirýshiler federasııasyn 1954 jyly Gonkongtyń tanymal kınematografısi, mesenat, medıamagnat, Qytaı kınoóndirisiniń bastaýynda turǵan Shaý Ifý qurǵan. Federasııanyń negizgi baǵyty – kınoóndiristi damytýdaǵy yqpaldastyq, Azııa-Tynyq muhıt aımaǵyndaǵy elder kınogerleri arasynda dostyq qarym-qatynasty nyǵaıtý, sonymen qatar, Azııadaǵy eń iri kınofestıvaldi dástúrli túrde ótkizip turý. Kınematografııasy damyǵan, álem moıyndaǵan Japonııa, Qytaı, Úndistan, Ońtústik Koreıamen qatar, federasııa quramyna, kınoóneri qarqyndy damyp kele jatqan Aýstralııa, Jańa Zelandııa, Malaızııa, Taıland, Vetnam, Indonezııa, Sıngapýr, Fılıppın, Iran, Pákistan sekildi 24 memleket múshelikke engen. Qazaqstan kınematografısteri úshin bul jańasha damý, jańa baǵyt. Bul kınoóndiristegi jańa tehnologııalardy ıgerý úshin jáne federasııa músheligindegi eldermen birlesken jobalardy iske asyrý arqyly sol eldiń kınonaryǵyna ený úshin taptyrmas múmkindik.
Aıta ketelik, sońǵy jyldary halyqaralyq yntymaqtastyq baǵytynda kınostýdııa birneshe jobany oraıly júzege asyra bastady. 2017 jyly «Qazaqfılm» úndistandyq kınematografıstermen birlesken jobany iske asyrǵan bolatyn. «Qazaqfılmniń» qatysýymen elimizdiń kórikti jerleri kórinis tapqan rejısser Sachındra Sharmanyń «Love you family» atty týyndysy alǵash ret tek qazaq tiline tárjimalanyp, «Týǵan úıim – tiregim» atty ataýmen otandyq kınoprokatqa jiberildi.
Sondaı-aq kınostýdııanyń óndirisinde Azııa-Tynyq muhıt elderi kınoóndirýshileri federasııasyna taǵy bir múshe memleket – Qytaımen jobasy bar. «Kompozıtor» fılmi Ekinshi dúnıejúzilik soǵysta Almatyda ómir súrgen qytaılyq kompozıtor Sı Sın Haı men qazaqtyń uly kompozıtory Baqytjan Baıqadamovtyń dostyǵy týraly baıandaıtyn kórkem týyndy.
Azııa-Tynyq muhıt aımaǵy elderiniń kınoóndirýshiler federasııasyna múshe bolý «Qazaqfılmge» birlesken jobalardy iske asyrýǵa múmkindik beredi. Búginde bul kınostýdııanyń basymdyq berip otyrǵan baǵyttarynyń biri.
Aıgúl AHANBAIQYZY, «Egemen Qazaqstan»
ALMATY