Anamnyń jańadan kelin bop túsken kezi eken. Mezgil qara kúz. Baıaǵy aıdalada eki úı qoıshy.
Ákeı kórshi aýylǵa asaý úıretýge ketip, sol kúni qoıdy atamyz jaıady. Tús kezinde anam tóbe basyna shyǵyp, otarǵa kóz salsa, atam quryqqa bórikti ilip, bulǵap tur eken. Shaqyrǵanyn túsinip tura júgirip kete beredi. Daýys jeter jerge taıanǵanda «myltyq, kúrek» degen sózdi estip, qaıtadan úıge qaraı zymyraıdy. Taıap qalǵanda úı syrtynda «ne boldylap» turǵan enesine «myltyq, kúrek» dep daýystaıdy. «Qoıǵa qasqyr shapqan shyǵar» dep topshylaǵan ájemiz oqshantaıdy kelinniń beline baılap, myltyq pen kúrekti qolyna ustatady.
Sóıtip anamyz ebil-debili shyǵyp atam turǵan jerge de jetedi ǵoı. Kúrek qolyna tıisimen atamyz dereý bir indi qazýǵa kirisedi. Kelinine «tez atqa min qalqam» dep buıyrady. Anam atqa minip alyp, qarap turypty. Indi biraz qazǵan soń atamyz attyń quıryǵyna shylbyrdy myqtap baılap, ekinshi ushyn inniń aýzyndaǵy belgisiz ańnyń sıraǵyna kúrmep ilip: «Qalqam atty tebinip, alǵa júr, «toqta» degende toqtaısyń, biraq burylyp qarama», deıdi. Atasynyń aıtqanyn buljytpaı oryndaıtyn jas kelin artyna qaıyrylyp qaramaı atty qamshylap júre beredi. Artqy jaqtan gúrs etken myltyqtyń úni estiledi. Anam aıtady: «Attyń bir aýyr nárseni súıretip kele jatqanyn sezem, biraq, atam «qarama» degen soń, qaraǵam joq. Bir kezde ǵana atamyz: «Al endi qaraı ǵoı» degeni. Jalt qarasam, azý tisi aqsıǵan nán kókjal qasqyr sulap jatyr. О́mirimde qasqyrdy jaqyn jerden tuńǵysh kórýim. Zárem ushyp ketti. Attyń qaı jaǵynan sekirip túskenim esimde joq, úıge qaraı qashtym. Álden ýaqytta dalaǵa shyqsam, atam qasqyrdyń terisin sypyryp, jaıyp qoıypty. Burynǵydaı qorqynyshty emes...
Nesin aıtasyń, oqys oqıǵadan keıin meniń ataǵym dúrkiredi. Atam jaryqtyq bóriniń jaıyn suraǵandarǵa «kelinim soqqan qasqyr» dep maqtanady eken. «Kelin soqqan qasqyrdy kóremiz» dep talaı kisi jer túbinen kelip-ketip jatty. Meni jurt «Qasqyr soqqan kelin» ataı bastady. Sodan yńǵaısyzdanyp atama: «Qasqyrdy siz attyńyz emes pe?» desem, «E, qalqam-aı, seniń jaqsy atyń shyǵa bersin! Bul saǵan táńirdiń ózi buıyrtqan ataq-olja shyraǵym! Eger sen myltyq ákep bermeseń, qoryqpaı qasymda turmasań men sol qasqyrdy atyp alar ma edim» dep, kúlli jurttyń aldynda jalǵyz kelininiń abyroıyn asyrady eken.
Aqyry sol qasqyrdyń terisin aýdan basshylary arnaıy suratqanda atam: «bizge ataǵy da jetedi, alsyn» dep sózge kelmesten berip jiberipti.
Tólegen JÁKITAI, jýrnalıst