Parlament Senaty Konstıtýsııalyq zańnama, sot júıesi jáne quqyq qorǵaý organdary komıteti qoǵamdyq qaýipsizdikti qamtamasyz etý salasyna sıfrlyq tehnologııany engizý men damytý jáne ıntellektýalyq júıeni qoldaný máseleleri boıynsha Ishki ister mınıstrliginde kóshpeli otyrys ótkizdi, dep habarlady Qazaqstan Respýblıkasy Parlamenti Senatynyń Baspasóz qyzmeti.
Komıtet tóraǵasy Georgıı Kım otyrysty asha kelip, azamattar qaýipsizdiginiń joǵary deńgeıine qol jetkizý Qazaqstannyń álemdegi eń damyǵan 30 memleketiniń qataryna enýin kórsetetin mańyzdy faktorlardyń biri ekenin atap ótti. Qazirgi kezde BUU-nyń «Jer ınstıtýty» reıtınginde Qazaqstan 159 eldiń ishinde 60-shy oryndy alady. Bizdiń elimiz qaýipsizdik deńgeıi boıynsha 141 eldiń arasynda 72-shi orynda tur. Osylaısha, turǵyndardyń ishki ister organdaryna degen senimin kórsetetin qaýipsizdik reıtıngi damyǵan elderden eleýli túrde artta qalyp keledi.
G. Kım halyqaralyq reıtıngtiń tómendigi men azamattar tarapynan aıtylatyn syndar ishki ister organdarynyń jekelegen qyzmetkerleriniń óz mindetterin sapaly atqarmaýy ǵana emes, osy saladaǵy jalpyǵa birdeı qabyldanǵan halyqaralyq standarttardyń joqtyǵy ekenin atap ótti. Osyǵan baılanysty, senator memlekettik qyzmet kórsetýlerdi, onyń ishinde qaýipsizdik salasyna qatysty sharalardy halyqaralyq standarttar deńgeıine kóterý qajettigin aıtty.
Ishki ister mınıstriniń orynbasary Erlan Turǵymbaev qoǵamdyq tártipti qorǵaýdyń jaı-kúıi, qylmyspen kúresti qamtamasyz etý jáne quqyq buzýshylyqtardyń aldyn alý isinde quqyq qorǵaý organdary júzege asyratyn sharalar, sondaı-aq ishki ister organdary qyzmetin sıfrlandyrý barysy týraly depýtattardy habardar etti.
«Sıfrly Qazaqstan» memlekettik baǵdarmasy aıasynda Ishki ister mınıstrliginde úsh ınvestısııalyq joba kózdelip otyr. Atap aıtqanda, «Polısııanyń ýchaskelik ınspektory» aqparattyq júıesi árbir ýchaskelik ıspektorǵa Ishki ister mınıstrliginiń ortalyqtandyrylǵan málimetter bazasyna qol jetkizýin qamtamsyz etýge arnalǵan. Avtomattandyrylǵan «Tergeýshi» aqparattyq júıesi málimetterdi jınaý men qorytý jónindegi qural bolyp tabylady, ol sotqa deıingi tergeýdiń búkil úderisterin avtomatty túrde atqarady. «Shaǵyn qalalardy jedel basqarý ortalyqtaryn qurý» úshinshi jobasy kóshelerde jáne basqa da qoǵamdyq oryndarda jasalǵan kez-kelgen tártip buzýshylyqtarǵa jedel áreket etýge arnalǵan. Qazirgi kezde bes qalada: Jańaózen, Rýdnyı, Hromtaý, Semeı jáne Shýchınskide jedel basqarý ortalyqtary iske qosylǵan. Joba aıasynda taǵy 35 shaǵyn qalany qamtý josparlanyp otyr.
E.Turǵymbaev atap ótkendeı, búkil qyzmetti sıfrlandyrýdyń basty maqsaty elimizdegi qoǵamdyq tártipti qorǵaýdy nyǵaıtý jáne quqyq buzýshylyqtardyń aldyn alý jónindegi ishki ister organdarynyń mindetterin iske asyrýdaǵy baqylaý, aıqyndyq jáne jedeldikti qamtamasyz etý bolyp tabylady. Qazirgi kezde ishki ister organdary beınebaqylaý jabdyqtarymen tek 10 paıyzǵa ǵana qamtamasyz etilgen.
Otyrysqa Ishki ister mınıstrligi qyzmetteriniń basshylary, Bas prokýratýranyń, aqparat jáne kommýnıkasııalar mınıstrliginiń, Astana qalasy ákimdiginiń, «Transtelekom», «Qazaqtelekom» aksıonerlik qoǵamdarynyń, «Kórkemtelekom» JShS ókilderi qatysty.
Kóshpeli otyrys aıasynda depýtattar Ishki ister mınıstrliginiń Jedel basqarý ortalyǵynda jáne Astana qalalyq ishki ister departamenti Jedel basqarý ortalyǵynda boldy. Senatorlar jolda júrý qaýipsizdigin qamtamasyz etýde qoldanylatyn beıne baqylaý monıtorlarynyń jumysymen, sondaı-aq ıntellektýaldy beınebaıqaý júıesin is júzinde paıdalaný barysymen tanysty.