«Nur Otan» partııasy Elbasy, partııasy Tóraǵasynyń tapsyrmasy boıynsha Halyqaralyq áıelder kúni qarsańynda «El analary» atty tyń bastamany qolǵa aldy. Osyǵan oraı elimizdiń ár óńirindegi barsha nurotandyqtar ǵasyr jasaǵan jáne jasy júzden asqan aq jaýlyqty ájelerdi merekemen quttyqtaýda, dep habarlady partııanyń baspasóz qyzmeti.
Jańa aksııa aıasynda «Nur Otan» partııasy Tóraǵasynyń birinshi orynbasary Máýlen Áshimbaev jasy 103-ke kelgen Astana qalasynyń turǵyny, eńbek jáne tyl ardageri Dana Qulmuhamedqyzy Dospolovany quttyqtady. Apamyz úıine arnaıy kelip, merekelik kóńil-kúı syılaǵan nurotandyqtarǵa rızashylyǵyn bildirip, aq batasyn berdi.
Dana áje 1915 jyldyń 12 qyrkúıeginde Aqmola oblysynyń Qorǵaljyn aýdanyna qarasty Janteke aýylynda týǵan. Jastaıynan eńbekke aralasqan asyl ájeı el tarıhynda erekshe mańyzǵa ıe Transsibir temir jol magıstraliniń qurylysyna da úles qosqan. Atalǵan magıstraldi salý kezinde apamyz aspaz bolyp jumys istegen eken. Soǵys jyldarynda da tylda eseli eńbek etip, Uly Jeńisti jaqyndatqan jandardyń qatarynda boldy.
Dana ájeıdi barsha nurotandyqtardyń jáne Elbasy, partııa Tóraǵasynyń atynan shyn júrekten quttyqtap, syı-sııapat tartý etken Máýlen Áshimbaev zaty asyl osyndaı apalarymyzdyń ónegege toly ómir joly jas urpaqqa qashanda úlgi ekenin aıtty. Olar ótken ǵasyrdyń qıyn-qystaý kezeńderi: azamat soǵysy, tarıhymyzda zulmat jyldar dep tańbalanǵan saıası qýǵyn-súrgin jáne Uly Otan soǵysy sııaqty nebir tar jol, taıǵaq keshýlerge taısalmaı tótep berip, eliniń erteńi úshin aıanbaı kúrese bildi. Sol arqyly apalarymyz qaısar rýh pen jalyndy jigerdiń jarqyn úlgisin kórsetti. Sonyń nátıjesinde aıaýly da asyl apa-ájelerimiz Qazaqstannyń táýelsiz el atanǵanyna kýá boldy. Búginde olar azat eldiń azat urpaqtaryn tárbıelep, nemere-shóbereleriniń ortasynda baqytty ómir súrýde.
– Meıirimdiliktiń nyshanyndaı bolǵan 8 naýryz – Halyqaralyq áıelder kúni – ádemiliktiń, izgiliktiń jáne jylylyqtyń merekesi. Soǵan oraı «Nur Otan» partııasy «El analary» degen aýqymdy sharany qolǵa alyp otyr. Osy aksııa aıasynda partııanyń barlyq fılıaldary ǵasyr jasaǵan jáne jasy júzden asqan ájelerimizdi úılerine arnaıy baryp quttyqtaýda, – deıdi Máýlen Áshimbaev.
Shyn máninde áýletiniń ǵana emes, tutas elimizdiń altyn qazyǵy, bereke-birliktiń uıytqysy bolyp otyrǵan osyndaı apa-ájelerimizdiń ómirinen alar sabaq mol. Sondyqtan nurotandyqtar abyz analardy jeke-dara quttyqtap, aq batalaryn alýdy ózderiniń abyroıly mindeti dep sanaıdy.
– El basyna kún týǵan qıyn-qystaý shaqta etigimen sý keship, keleshek urpaq úshin janyn berip eńbek etken aıaýly jandarǵa qurmet kórsetýdi ózimizdiń azamattyq boryshymyz dep esepteımiz. О́ıtkeni bizdiń búgingi baqýatty ómirimizdiń bastaýynda elimizdiń irgesi berik, birligi bekem bolýyna zor eńbek sińirgen osyndaı analarymyz tur, – degen Máýlen Áshimbaev Qazaqstandaǵy barlyq aq jaýlyqty ájeler men aıaýly arýlardy aıtýly merekemen shyn júrekten quttyqtady.
Búginde Qazaqstan boıynsha jasy júzge jetken jáne asqan 415 ájeı bar. Olardyń basym bóligi, ıaǵnı 80-i Ońtústik Qazaqstan oblysynda turatynyn atap ótken jón.
Aıta keteıik, «El analary» aksııasy elimizdiń barlyq óńirinde ótkizilýde. Sonyń aıasynda nurotandyqtar oblys, aýdan ortalyqtarymen qatar, shalǵaıda ornalasqan aýyldy jerlerdegi apa-ájelerimizdi de arnaıy baryp, merekelerimen quttyqtaýda.