О́r namys, qaısar minez qashannan da qazaq qyzdaryna tán qasıet. Bul turǵyda bir ǵana Álııa men Mánshúkti alǵa tartsaq jetkilikti. Osynaý beıbit zamanda bilek pen júrek kúshin qatar ushtastyryp, baıraqty básekelerde el mereıin ústem etip júrgen Nazym Qyzaıbaı, Álııa Iýsýpova keshegi qaharman ákpeleriniń zańdy jalǵasy emes dep kim aıta alady. Solardyń biri – Ońtústik Koreıanyń Phenchhan qalasynda ótip jatqan paralımpııa oıyndaryna el namysyn arqalap ketken alty sportshynyń ishindegi jalǵyz názikjandy, shańǵymen syrǵanaýshy Jańyl BALTABAEVA.
Birer kún buryn paralımpıadashylardy Phenchhanǵa shyǵaryp salý rásiminde Jańylǵa birer suraq qoıýdyń sáti túsken edi.
– Jańyl búginge deıin jetken jetistikteriń az emes. Birneshe dúrkin el chempıony atanyp, halyqaralyq jarystarda, Azııa birinshiliginde jaqsy nátıjemen kórindiń. Tórt jyl buryn Sochıde ótken paralımpıada oıyndaryna da qatysqanyńdy bilemiz.Daıyndyǵyń qalaı?
– Iá, talaı jarystarda baǵymdy synadym. Segiz birdeı álem kýbogy báıgesine qatystym. О́zińiz aıtqandaı, kóptegen básekede tabysty óner kórsettim. Degenmen, Sochıde ótken paralımpııa oıyndarynda bes shaqyrymdyq jekelegen jarys jolynda nebári 23-orynǵa taban tiregen edim. Odan beri tórt jyl ýaqyt ótti. Tájirıbem tolysyp, tyńǵylyqty jattyǵý jasadym. Phenchhanǵa fızıkalyq jaǵynan da, rýhanı turǵydan da daıynmyn desem bolady. Atalǵan paralımpııa oıyndarynda el namysyn qorǵaıtyn jalǵyz qyz bolǵandyqtan ıyǵymdaǵy júktiń salmaǵy jeńil emes ekenin jaqsy sezinem. Maǵan artylǵan senim údesinen shyǵyp, jarysta bar múmkindigimdi kórsetem degen oıdamyn.
– Jaýapty sátterde saǵan jiger syılaıtyn ne nárse?
– Jarys jolyna shyqqanda nemese kez kelgen jaýapty sátte meni aldymen qanattandyratyn ózimniń anam. Ol kisi maǵan jaryq álemdi syılady. Qarshadaı kúnimnen bar aýyrtpalyǵymdy kóterip, deneni dendegen dertti de, árbir qıyndyqty da, bárin-bárin jeńip shyǵýǵa bolatynyn úıretti. «Eń bastysy, qandaı qıyndyqqa da moıyma. Sońyna deıin kúrese bil. Myqty bol!» dep únemi aıtyp otyrady. Ár jeńisime qýanady. Búkil jer betindegi jylylyq anamnyń qulynym dep basymnan sıpaǵan aıaly alaqanynan, meıirlene qaraǵan júzinen taraıtyn sııaqty. Sol meıirim, sol jylylyq meni barlyq jeńisterge jeteleıdi.
– Bilýimizshe, sen shańǵymen syrǵanaýdan bólek sý sportymen, sondaı-aq jeńil atletıkamen aınalysasyń. Birneshe sport túrimen qatar aınalysý qıyndyq týdyrmaı ma?
– Onyńyz ras. Júzýden tórt dúrkin el chempıony atandym. Jeńil atletıka spartakıadasynda eki márte top jaryp, sý sporty spartakıadasynda qola júldege qol jetkizdim. Árıne bir sport túrimen turaqty túrde aınalysqan durys. Bul nátıjeniń kilti. Ár sporttyń qyr-syryn, ózine tán ereksheligin búkil bolmysyńmen, jan dúnıeńmen sezinbeı, tynymsyz ter tókpeı jeńiske jetem deý beker. Sport meniń ómirimniń máni. Bar qıyndyqty umyttyratyn jan serigim. Janym men tánimniń emshisi. Birneshe sport túrin qatar alyp júrý meniń múmkindigimdi shektemeıdi. Degenmen, paralımpııa oıyndarynda el baıraǵyn kókke kóterý meniń eń úlken armandarymnyń biri. Sondyqtan sońǵy jyldary paralımpıadaǵa daıyndyq barysynda shańǵy sportyna kóbirek kóńil bóldim.
– Sýda júzýden jas sportshylardy jattyqtyratynyńdy bilemiz. Odan bólek bos ýaqytyńdy nemen ótkizesiń?
– Adamnyń syrtqy saýyty men ishki baılyǵy, bilimi saı bolýy kerek dep esepteımin. Sportty janyma serik ete júrip eki birdeı joǵary oqý ornyn bitirdim. О́tken jyly ǵana «Shańǵymen syrǵanaý jáne bıatlon» mamandyǵy boıynsha magıstratýrany aıaqtadym. Qolym qalt ete qalǵanda, ádebı shyǵarmalar oqyp, tanymdyq baǵyttaǵy kınofılmder tamashalaımyn. Sol arqyly ózimdi rýhanı baıytyp otyramyn. Al negizgi ýaqytym sporttyń aınalasynda ótedi.
– Jańa bir sózińde jer betindegi barlyq jylylyq ananyń alaqanynan taraıdy degen ediń. Halyqaralyq áıelder kúni merekesinde gazetimiz arqyly analar men qyzdarǵa qandaı tilek bildiresiń?
– «Egemen Qazaqstan» gazetiniń barsha názikjandy oqyrmandaryn shýaqty merekemen shyn kóńilmen quttyqtaımyn! Aq jaýlyqty ájelerimiz ben analarymyz aman bolsyn! Barsha qyz-kelinshekterimizge jaqsy urpaq tárbıelep, ana baqytyn sezinýdi násip etsin. Alla buıyrtyp, paralımpııa oıyndarynan oljaly oralyp jatsam anama ǵana emes ózime, barsha arýlar qaýymyna, týǵan elime jasaǵan eń úlken syıym sol bolar.
– Áńgimeńe rahmet.
Áńgimelesken
Arman OKTIаBR, «Egemen Qazaqstan»