Naýryz aıy týsa da qylyshyn súıretken qys óńirden áli kete qoıǵan joq. Jýannyń jińishkerip, jińishkeniń úziletin, kúnniń uzaryp, túnniń qysqaratyn shaǵy endi bastalǵany belgili. «Ash qaryn jubana ma maıly as jemeı» dep uly Abaı aıtqandaı, dál osy kezde qystan qysylyp shyqqan jurtqa maıly as bolmasa da, qunarly taǵam qajet-aq. Ol qunarly taǵamyńyz qaltańyzǵa salmaq salmasa tipti ǵanıbet emes pe?
Aıtaıyn dep otyrǵanymyz, jaqynda Abaı aýdanynyń ortalyǵy – Qaraýyl aýylynda jergilikti ákimdik pen Semeıdiń irgesindegi «Agrofırma «Prırechnoe» JShS arasynda jasalǵan memorandým aıasynda aýyl sharýashylyǵy ónimderiniń jármeńkesi uıymdastyrylyp, 15 tonna azyq-túlik pen kókónis arzan baǵada saýdalandy.
Aýdan ákiminiń orynbasary Marat Edilbaevtyń aıtýynsha, aqpannyń 20-sy kúni ótken jármeńkede 7,5 tonna kartop, 530 keli sábiz, 270 keli qyzylsha, 1 tonna sarymsaq pen 675 keli oramjapyraq pyshaq ústinen satylyp ketipti. Kókónisterdiń barlyǵy bar bolǵany 83 teńgeden saýdaǵa shyǵarylǵandyqtan jurt talap alypty.
«Negizgi azyq-túlik taýarlary boıynsha baǵanyń ósýin boldyrmaý maqsatynda aýdan ákimdigi tarapynan birqatar sharalar júzege asyrylyp keledi. Osy rette ótken jyldyń 13 qazanynda Semeı qalasyna qarasty «Agrofırma «Prırechnoe» JShS-niń dırektory Muhıt Tumabaevpen aýdan ákimdigi eki jaqty memorandýmǵa qol qoıǵan bolatyn. Atalmysh kelisim aıasynda óńirimizdegi eń irgeli kókónis ósiretin sharýashylyq osymen ekinshi márte aýdan ortalyǵyna arzan baǵadaǵy azyq-túlik taýarlaryn ákelip otyr. Alǵashqy jármeńke 13-14 aqpan kúnderi ótse, bir aptadan keıin, mine, ekinshi márte jármeńke uıymdastyryldy. Alǵashynda aýdanǵa jalpy kólemi bes tonnadan (2,7 tonna kartop, 630 keli sábiz, 280 keli qyzylsha, 910 keli sarymsaq, 800 keli oramjapyraq) astam azyq-túlik ónimderi jetkizilgen bolatyn. Turaqtandyrý qorynan bólingen ónimder tikeleı óndirýshiden jetkendikten álbette ústeme baǵasyz bolatyny anyq. Bul sóz joq, aýdanymyzdaǵy osynaý azyqtyq ónim túrleriniń baǵasyn birshama turaqtandyryp, jurtshylyqtyń qajetin óteıtin ıgilikti shara dep bilemiz», - deıdi aýdan ákiminiń orynbasary.
Azamat QASYM,
«Egemen Qazaqstan»
Shyǵys Qazaqstan oblysy,
Abaı aýdany