Senesiz be, senbeısiz be, Úrjar aýdanynda sońǵy 30 jyl kóleminde birde-bir kópqabatty turǵyn úı salynbapty. Aýdan ortalyǵyndaǵy sońǵy kópqabatty úıler 80 jyldary turǵyzylǵan kórinedi. Alla sátin salsa, bıyl osy olqylyqtyń orny toltyrylyp, 30 páterli kópqabatty turǵyn úı boı kóteretin bolady.
Memlekettik «О́ńirlerdi damytý» baǵdarlamasy aıasynda salynatyn qurylys nysanyna 280 mıllıon teńge qarjy qarastyrylyp otyr. Úrjar aýdandyq Turǵyn úı-kommýnaldyq sharýashylyq jáne qala qurylysy bóliminiń sektor meńgerýshisi Soltanǵazy Elemesovtiń aıtýynsha, qazirgi ýaqytta úıdiń jobalyq-smetalyq qujattamalary ázirlenip, memlekettik saraptamadan ótkizilgen.
«Qurylysqa tek otandyq ónimderdi paıdalanamyz. Nysan ortalyqtandyrylǵan sýmen, ortalyqtandyrylǵan jylýmen qamtamasyz etiledi. Qaladaǵy úılerden esh kem bolmaýǵa tıis», - degen ol qurylys jumystary sátimen aıaqtalsa kópbalaly analar men asyraýshysynan aıyrylǵan balalar, áleýmettik jaǵynan az qamtylǵan otbasylar men memlekettik qyzmetkerler baspanamen qamtylatynyn jetkizdi. Aýdandyq máslıhattyń depýtaty Zýhra Turapova qazirgi kúni aýdanda 600-den astam adam baspana kezeginde turǵanyn aıtady.
«2015 jyly aýdan ákimi Serik Zaınýldınniń bastamasymen 27 páterli turǵyn úı boı kóterip, nátıjesinde 27 otbasy baspanaly bolǵan edi. Bıyl kópqabatty turǵyn úı halyq ıgiligine berilse ájeptáýir kómek bolatyny anyq», - deıdi ol.
Azamat QASYM,
«Egemen Qazaqstan»
Shyǵys Qazaqstan oblysy,
Úrjar aýdany