Oral qalasynda belgili aqyn, Qazaqstan Jazýshylar odaǵynyń múshesi Baýyrjan Halıolla «Jan tebirenis» atty jańa kitabyn oqyrman qaýymǵa usyndy. Jańa jyr jınaǵynyń tanystyrylymy Hadısha Bókeeva atyndaǵy Batys Qazaqstan oblystyq qazaq drama teatrynda ótti.
Qazaqstan Jazýshylar jáne Jýrnalıster odaǵynyń, Aıtys aqyndary men jyrshy-termeshilerdiń halyqaralyq odaǵynyń múshesi, «Eren eńbegi úshin» medaliniń ıegeri Baýyrjan Halıollanyń bul kitaby jaqynda Almaty qalasynan jaryq kórgen. Kitaptyń tusaýkeser saltanatynda Almaty qalasynan arnaıy kelgen Qazaqstannyń Memlekettik syılyǵynyń jáne Sholohov atyndaǵy halyqaralyq ádebıet syılyǵynyń ıegeri, jazýshy Sábıt Dosanov sóz alyp, jas aqynnyń ıyǵyna shapan japty. Aıtys sahnasynda da, jazba poezııada da óz órnegin salyp júrgen aqyn shyǵarmashylyǵyna tabys tiledi.
Keshti Baýyrjannyń synyptas dosy, belgili aqyn Talant Arǵynǵalı júrgizdi. Kórermen qaýym kesh ıesiniń aqyndyq qyrynan bólek, sazgerlik qabiletine de qol soqty. О́ıtkeni kesh boıyna ánin de, sózin de Baýyrjan Halıolla jazǵan ánder men tolǵaýlar oryndalyp, sharanyń shyraıyn kirgize tústi.
Baýyrjannyń keshine kórshiles Atyraý óńirinen oblystyq mádenıet basqarmasynyń basshysy Salamat Sabyr bastaǵan delegasııa arnaıy kelip, qoshemet kórsetti. Batys Qazaqstan oblysy ákiminiń orynbasary Ǵabıdolla Ospanqulov óńir basshysy Altaı Kólginovtiń atynan kesh ıesin quttyqtady.
Aıta keteıik, Baýyrjan Halıollanyń buǵan deıin «Jumbaq qyzdyń janary» «Názik bult kóship barady» «Juldyz jaýǵan jaryq tún» atty jyr jınaqtary jaryq kórgen bolatyn.
Qazbek QUTTYMURATULY,
«Egemen Qazaqstan»
ORAL
Sýretti túsirgen
Rafhat HALELOV