Kúni keshe ǵana Elbasymyz memlekettik tildiń qoldaný aıasyn keńeıtý maqsatynda: «Parlament pen Úkimettiń jumysy memlekettik tilde júrgizilýi tıis» dep taıǵa tańba basqandaı naqty tapsyrma berdi. Bul táýelsizdigi shırek ǵasyrdan asqan Qazaq eli úshin óte oryndy jáne der kezinde bergen tapsyrma.
Biz, Májilistegi «Aq jol» partııasy fraksııasynyń músheleri Elbasynyń bul tapsyrmasyn tolyq jáne qyzý qoldaı otyryp, ony júzege asyrýǵa atsalysýǵa daıyndyǵymyzdy bildiremiz. 2012 jyly Parlamentte «Aq jol» QDP-nyń tuńǵysh ret parlamenttik fraksııasy qurylǵannan keıin, bizdiń eń alǵashqy daıyndaǵan zań jobamyz memlekettik tildiń qoldaný salasyn keńeıtý týraly edi.
Biraq biz ony usynǵan kezde, Úkimettiń vedomstvoaralyq komıssııasy jobany qoldaýdan bas tartyp, iske asyrýǵa jol bermedi. Múmkin Úkimet ol kezde osyndaı áreket áli erte dep sanaǵan shyǵar.
Al búginde Elbasymyzyń ózi mundaı bastamaǵa uıytqy bolǵandyqtan, máseleni keıinge qaldyrýǵa bolmaıdy. Bizdiń oıymyzsha, qazirgi kezde qoǵamda bul másele pisip-jetilip, sheshimin kútýde. Búginde mektep qabyrǵasyndaǵy oqýshylardyń 80 paıyzy qazaq tilinde bilim alyp jatqany, ıaǵnı bizdiń bolashaǵymyz, XXI ǵasyrdaǵy ómirimiz de osy qazaq tilimen tyǵyz baılanysty ekeni, tipti qazaq tilinsiz damý múmkin emes ekeni barshamyzǵa belgili. Sol sebepti «Aq jol» QDP bıznes partııa- sy retinde bul ıgi bastamany tek saıa- sat pen memlekettik qyzmet aıasynda ǵana emes, jalpy ekonomıkalyq negizde de qoldaýdy qalaımyz. Memlekettik tilimizge ekonomıkada suranys týyp, ana tilimiz ǵylym men tehnologııa tiline aınalatyn bolsa, tilimizdiń bolashaǵy da senimdi bolar edi.
Elbasynyń naqty tapsyrmalaryn quptaı otyryp, ony kelesi usynystar- men tolyqtyrýdy ótinip biz Úkimet basshysy B.Saǵyntaevtyń atyna depýtattyq saýal joldadyq:
1. Qazir qazaq tilinen emtıhandy tek prezıdenttikke úmitkerler ǵana tapsyrady. Bizdiń oıymyzsha, memlekettik tildi mindetti túrde ıgerýge tıisti laýazymdy sheneýnikterdiń tizimin budan da keńeıtýdi qarastyrý kerek.
2. Qoǵamdyq ómirdiń ártúrli salalarynda memlekettik tildiń qoldanylý aıasyn keńeıtý, sondaı-aq halyqaralyq kompanııalardy qazaqstandyq kadr- larmen qamtýdy ulǵaıtý maqsatynda áleýetti ınvestorlarǵa ınvestısııalyq preferensııalar bergende, jer qoınaýyn paıdalanýǵa quqyq alýǵa kelisimsharttarda konstıtýsııalyq normalarǵa sáıkes memlekettik tildi mindetti túrde paıdalaný talabyn belgileý kerek.
Osyndaı kózqarasty óziniń munaı-gaz salasyn damytýda álemge úlgi bolyp otyrǵan Norvegııa eli de ustanyp otyr. Olardyń «Munaı týraly» zańnyń 6 jáne 37-baptarynda bylaı delingen: «Munaıǵa qatysty qyzmette múmkindiginshe norveg tili basym paıdalanylýǵa tıis. Basqa tilder qajetti nemese aqylǵa qonymdy bolǵan jaǵdaıda paıdalanylýy múmkin».
Biz bul mysaldy tildiń damýy men dárejesinde ekonomıkanyń orny erekshe ekenin kórsetý úshin keltirip otyrmyz. Elbasynyń osy taǵdyrsheshti tapsyrmalary qoǵamda qyzý talqylanyp, qoldaýǵa ıe bolýda. «Aq jol» QDP fraksııasy Elbasynyń qazaq tili týraly berilgen tapsyrmasyn naqty oryndaý maqsatynda, joǵaryda aıtylǵan usynystar týraly zań jobasyn daıyndaýǵa shaqyrady.
Berik DÚISENBINOV,
Májilis depýtaty