Birneshe kún qatarynan tolastamaı jaýǵan jańbyr Shyǵys Qazaqstannyń 6 birdeı (Aıagóz, Úrjar, Kúrshim, Ulan, Glýbokoe, Zaısan) aýdany men oblys ortalyǵy - О́skemen qalasynyń turǵyndaryn ábigerge túsirýde. Búgin aýa-raıynyń qolaısyzdyǵyna baılanysty О́skemen men Rıdder qalasynda birinshi aýysymdaǵy mektep oqýshylary, 1-2 kýrs stýdentteri sabaqtan bosatyldy.
Shyǵys Qazaqstan oblystyq tótenshe jaǵdaılar departamenti baspasóz qyzmetiniń taratqan sońǵy málimetterine súıensek, óńirdegi sý kirgen úılerdiń sany 70-ke jetken. Aıagóz aýdanynda 40 úı, О́skemende 8 úı jáne 27 aýla, Ulan aýdanynda 2 úı men 4 aýla, Glýbokoe aýdanynda 3 úı men 53 aýla, Kúrshim aýdanynda 42 aýla qarǵyn sýdyń qursaýynda qalǵan. Sý jaıylǵan aýdandarda oblystyq jáne respýblıkalyq mańyzdaǵy joldar jabylsa, taýly aýdandarda kóshkin qaýpi bar. Tótenshe jaǵdaı, jergilikti polısııa qyzmetkerleri, «О́skemen Tártip», «Vodokanal», Shyǵys óńirlik aeroutqyr qutqarý jasaǵy ókilderi 1440 qumqap tósep, 13 000 tekshe metr sý sorǵytqan.
Erigen qar sýynyń jolǵa shyǵyp ketý oqıǵasy Kúrshim, Ulan, Zaısan, Ulan jáne Úrjar aýdandarynda tirkelgen. Daǵdarys ortalyǵynan qurylǵan 1000 adamdyq apattyq-qutqarý tobynyń 536 ókili qazir apat saldarymen kúresýde. Sondaı-aq, 137 tehnıka men 27 sý sorǵy qural jumyldyrylǵan.
Tasqyn zardaby ásirese Aıagóz qalasynyń turǵyndaryna qıynǵa soǵyp tur. 11 naýryz Aıagóz aýdany ákiminiń ókimimen Aıagóz qalasy boıynsha tabıǵı sıpattaǵy jergilikti aýqymdaǵy tótenshe jaǵdaı jarııalanǵan bolatyn. Aýdandyq ishki saıasat bólimi mamandary erigen qar men jaýyn shashyn sýy 3 avtokólik, 5 jaıaý júrginshi ótkeli men 20-ǵa jýyq úıdi basyp qalǵanyn, sý alǵan úılerden 400 adam (onyń 30-y bala) qaýipsiz jerge kóshirilip, Aıagóz qalasyndaǵy qazaq mektep-lıseıine, №6 orta mektep-ınternatqa jáne týystaryna ornalastyrylǵanyn habarlaǵan edi. Búgin Aıagóz aýdandyq tótenshe jaǵdaı bóliminiń basshysy J.Qalıevpen sóıleskenimizde bul málimetterge azdaǵan ózgerister engenin baıqadyq. Onyń aıtýynsha, qazirgi ýaqytta 40 úı men 100 aýla apatty dep tanylypty, 3 úıdiń byt-shyty shyǵyp, túgi qalmaǵan kórinedi. Arnaıy qurylǵan komıssııa oqıǵa ornynda kelgen shyǵyndy, buzylǵan, qıraǵan úıler sanyn anyqtap jatyr. «Jumys toby qazir úılerdi aralap, shyǵyn kólemin anyqtaýmen shuǵyldanýda. Kóshirilgen adamdar jatyn orynmen, tamaqpen qamtamasyz etildi. Aýdandaǵy aqsaqaldar, jastar, basqa da turǵyndar qoldan kelgen kómekterin kórsetip jatyr. Qaladaǵy «Shokolod» «Báıterek» degen dámhanalarda tegin tamaq uıymdastyrylǵan» dedi Aıagóz aýdandyq Ishki saıasat bóliminiń basshysy Medet Myrzykeshov.
Búgin oblys ákimi Danıal Ahmetov О́skemendegi sý basqan shaǵyn aýdandardy aralap, turǵyndarymen kezdesti. Bul týraly tolyǵyraq aqparatty oqyrman nazaryna usynatyn bolamyz.
Azamat QASYM,
«Egemen Qazaqstan»
Shyǵys Qazaqstan oblysy