Ortalyq kommýnıkasııalar qyzmetinde «Qazposhta» AQ-tyń 2017 jylǵy jumys qorytyndylary men 2018 jylǵy josparlary týraly baspasóz máslıhaty ótti. «Qazposhta» AQ basqarma tóraǵasy Sáken Sársenov kompanııada 22 myńnan astam adam jumys isteıtinin, 3,5 myńǵa jýyq bólimshelerdiń 80 paıyz avtomattandyrylǵanyn, fılıaldardyń 70 paıyzy aýyldyq jerlerde ornalasqanyn, olar 100 paıyz aýyldyq eldi mekenderdi qamtıtynyn baıandady.
«Poshtany tasymaldaýǵa arnalǵan avtokólikterden basqa 37 poshtalyq vagonymyz bar. Oǵan qosa shalǵaıdaǵy aýyldarǵa poshtany 2 kıloǵa deıin kóteretin drondarmen jetkizýdi qolǵa aldyq. Byltyrdan beri 1,5 tonna hat-habarlar jetkizdik. Qazir biz 4 kılo kóteretin drondardy synaqtan ótkizip jatyrmyz. Kompanııamyzǵa ótken jyl kóptegen jańa jetistikter ákeldi. 2017 jyly kompanııanyń jalpy kirisi 49,2 mlrd teńgeni qurady, 2016 jylmen salystyrǵanda kirister 18 paıyzǵa artty. Elektrondy saýdanyń jáne sıfrly tehnologııalardyń damýy, naryqtaǵy básekelestiktiń joǵarylaýy Qazposhtanyń jumys isteý prosesterin túbegeıli ózgertti. Endi biz sapaǵa baǵyttalǵan ozyq tehnologııalardy qoldanatyn boldyq. 2017 jyly biz 138 mıllıon gazet pen jýrnaldy jetkizdik. Aýdandarǵa olardyń 93 paıyzy bir kúnniń ishinde jetkiziledi. Byltyr 17 mln-nan astam sálemdeme jetkizsek, olardyń 11 mln-y halyqaralyq sálemdemeler. Qazaqstan boıynsha sálemdemelerdi jetkizý merzimi 16 kúnnen 6 kúnge deıin qysqardy. Sálemdemeler 35 baǵyt boıynsha kúnbe-kún jetkiziledi. Shetelden keletin sálemdemelerdi jetkizý merzimi 45 kúnnen 25 kúnge deıin qysqartyldy», dedi basqarma tóraǵasy.
Sonymen qatar ol byltyr iske qosqan avtomattandyrylǵan suryptaý mashınasy ónimdilikti 10 ese ósirgenin, endi táýligine 10 myń emes, 120 myń sálemdemeni óńdep poshta bólimshelerine jiberetinderin jetkizdi.
«Samuryq-Qazyna» qorynyń transformasııalaý baǵdarlamasyn júzege asyrý maqsatynda 140 poshta bólimshesi jańǵyrtyldy. Onda elektrondy kezek, beınebaqylaý kameralary, sálemdemeler sýpermarketteri men poshtamattar ornatyldy. Sonymen qatar byltyr shaǵyn ınternet-magazınder men naryqta saýda júrgizetin satýshylar úshin E-commerce ortalyǵyn ashtyq. Bul – ınternet-dúkenderge qyzmet kórsetýge arnalǵan bólimshe. Qazir ortalyqta 40-tan astam ınternet dúkenge qyzmet kórsetiledi. Bıyldan bastap munda ınternet-dúkender úshin trenıngter men semınarlar ótkiziledi. Mysaly, baılanys ortalyǵyn aýtsorsıngke bergen soń qonyraý shalý deńgeıi 68 paıyzdan 97 paıyzǵa deıin artty. Sondaı-aq Kontakt-ortalyǵyna arnalǵan jabdyqty satyp alýǵa kúrdeli shyǵyndardyń qajettiligi joıyldy. Orta eseppen bul qyzmettiń shyǵyndary jylyna 21,6 paıyz tómendeıdi dep josparlap otyrmyz. 300 jańa bankomat, 120 termınal jáne elimizdiń áýejaılarynda ornalasqan sot qaryzyn óteý fýnksııasy bar 11 termınal ornatyldy. Búgingi tańda bólimshelerimizde 101 sálemdeme sýpermarketi jáne 151 poshtamat jumys isteıdi», dedi ol.
«Qazposhta» AQ basqarma tóraǵasy Sáken Sársenov Memleket basshysynyń jalaqylary tómen azamattardyń salyq aýyrtpalyǵyn tómendetýge baǵyttalǵan bastamalaryn qoldap, bıyl 9 myńǵa jýyq jumysshynyń tabys salyǵyn 10 esege tómendetýdi kózdep otyrǵanyn atap ótip, oǵan qosa óndiristik personaldyń jalaqysyn bıyl taǵy 15 paıyzǵa kótergendikterin alǵa tartty.
Raýan QAIDAR, «Egemen Qazaqstan»