Oblys ákimdigi men «ERG» kompanııalar toby ózara yntymaqtastyq týraly memorandýmǵa qol qoıdy. ERG kompanııalar toby men oblys ákimdigi arasyndaǵy kelisimge saı Eýrazııalyq toptan 2018-2019 jyldary óńirdiń damýyna 3,7 mlrd teńge qarajat bólinedi.
Bul qarjy oblys ortalyǵynda, Ekibastuz jáne Aqsý qalalarynda ınjenerlik-kommýnıkasııalyq júıeler tartýǵa, oblys ortalyǵyndaǵy «Tramvaı basqarmasy» AQ jumysyn jaqsartýǵa, hokkeı kortyn salýǵa, Aqsýda sport kesheni qurylysyna, ortalyq jaǵalaýyn kóriktendirýge jumsalmaq. Tipti oblys ortalyǵynda jańadan taǵy da bir muz saraıy salynbaqshy.
– Kompanııa qarjysynyń basym bóligi sportty damytýǵa baǵyttalady. Oblys ortalyǵyndaǵy «Astana» muz saraıynda kásibı sportshylardyń jattyǵýlary jıi ótedi. Otbasylyq dene- shynyqtyrý sharalaryna múmkindik azdaý. Ata-analar jańa muz saraıyn salý qajettigin suraýda. Sondyqtan óńir jurtshylyǵynyń áleýmettik áleýetin jaqsartýǵa úles qosyp kele jatqan kompanııa basshylyǵyna alǵys bildiremin, – dedi oblys ákimi B.Baqaýov.
Jýyrda ǵana «Prezıdenttiń bes áleýmettik bastamasy» atty Elbasynyń halyqqa Úndeýi jarııalandy. Áleýmettik baǵyttaǵy bul usynystar elimizde turatyn árbir adam úshin mańyzdy. Bıyl oblysta 300 myń sharshy metr turǵyn úı paıdalanýǵa berilmek. Oblys bıýdjetinen ınjenerler, dárigerler men pedagogtar daıarlaýǵa 200 grant qarastyrylýda. Byltyr oblysta eki jataqhana salyndy. Bul jaqsy úrdis bıyl da jalǵasady. Oqý oryndary basshylarynyń aıtýlarynsha, jyl saıyn stýdentter qatary kóbeıýde, olaı bolsa, oblys ortalyǵyndaǵy joǵary oqý oryndaryna 3 myń oryndyq jataqhana da qajet. Buǵan oblys ákimdigi aldaǵy ýaqytta jobalaý-smetalyq qujaty ázirlense, memleket-jekemenshik áriptestigi aıasynda máseleni sheshý joly qarastyrylady dep otyr.
Jalpy, bıznestiń áleýmettik jaýapkershiligi búkil álemde bar. Alyp kompanııalar óz qarjysy arqyly bilim berý, medısına, ǵylym, óndiris damýyna ınvestısııa bóledi. Bul jaýapkershilik-turaqty áleýmettik ınstıtýt retinde bizdiń elimizde de qyzmet etedi. Bıznestiń áleýmettik jaýapkershiligi tujyrymdamasy ázirlendi. Bul 2008 jyldan beri júzege asyrylyp kele jatqan Elbasy tapsyrmasy. Sońǵy jyldary «ERG» kompanııalar toby óńirdegi bıznestiń áleýmettik jaýapkershiligi maqsatyna 11 mlrd teńge bólipti. Bul qarajatqa oblys ortalyǵynda tústi metallýrgııa kolledji jataqhanasy, sport zaldary salyndy. Bul kúnderi Baıanaýylda Myrzashoqy shańǵy kesheni, arqandy jol men oblys ortalyǵynda basseınniń qurylysy júrgizilýde. Jáne Astananyń 20 jyldyǵyna oblystyń tartýy retinde qalada salynyp jatqan velosıped jolynyń qurylysyn da kompanııa qarjylandyrǵan. О́ńirde 22 myńnan astam adam «ERG»-ge qarasty jergilikti óndiris oryndarynda eńbek etýde.
Farıda BYQAI, «Egemen Qazaqstan»
Pavlodar oblysy