Áýletimizdegi qundy jádigerdiń biri – ataqty Estaı Berkimbaıulynyń chemodany. Bul áıgili babamyzdan qalǵan kóz.
Atamyzdyń nemere inisi, aqynnyń qolynda ósip, týǵan balasyndaı bolyp ketken Qyzdarbek atamnyń jatyn bólmesinde, kóne kók shkaftyń ústinde turatyn chemodandy kúnde kórip júrsek te, ishin ashýǵa dátimiz barmaıtyn. Úlkenderdiń «Chemodanǵa tııýshi bolmańdar!» degen qatań eskertýinen soń, bul zatty tek sol kisilerdiń ruqsatymen ǵana jerge túsiretinbiz. Chemodannyń eski ekendigi baıqalyp tursa da, óte uqypty ustalǵan. Qyzdarbek atam onyń ishine eski dinı kitaptar men gazetterdi saqtaıdy. Namazyn qaza qylmaıtyn aýyl moldasynyń Allanyń, Paıǵambarymyzdyń esimderi jazylǵan dúnıelerdi aıaqasty etpeı, qol jetpes bıikte tursyn degeni ǵoı.
2000-jyldardyń basynda bizdiń úıge aq «Gazel» mingen qalalyq qonaqtar keldi. El aralap, kóne jádigerlerdi jınastyryp júrgen Pavlodar qalasyndaǵy ánshi Maıra Ýálıqyzynyń mýzeıiniń ókilderi eken. Oblys ortalyǵynan shalǵaıda ornalasqan Shuǵa aýylyna atamdy ádeıi izdep kelipti. Maqsattary – Estaı babamyz tutynǵan dúnıelerdi, basqa da kóne zattardy mýzeıge alyp ketý. Atamnyń buıryǵymen úıdiń shatyryna shyǵyp, shıden toqylǵan et saqtaǵyshty, bir jaq murty mújilgen aǵash tabaqty jáne ózge de eski zattardy tómenge túsirip, kólikke tıedik.
Qonaqtar ketken soń keshki shaı ústinde daýysy jaryqshaqtana shyqqan atamnyń: «Kezinde turmysta qoldanylǵan dúnıeler qazir qajetke jaramaıdy ǵoı. Sondyqtan bolashaq urpaq kórip, bilsin degen nıetpen shatyrdaǵy eski zattardy mýzeıge ótkizdim jáne durys qadam jasadym dep oılaımyn. Al Estaı babamnan qalǵan qara chemodandy tiri turǵanda eshkimge bermespin. Babamnyń kózi ǵoı», – degen sózi esimde.
О́kinishke qaraı, atamnan qara chemodannyń bizdiń úıge qalaı kelgenin suramappyn. Al onyń tarıhyn qazirgi Ekibastuz qalasyna qarasty Jaıylma aýylynda turatyn Estaı aqynnyń úlken nemeresi Zeken apa aıtyp berdi.
«Sizdiń úıdegi qara chemodan Estaı atamnyń Qyzdarbek aǵama jasaǵan syılyǵy edi. Dál osyndaı chemodan mende de bolǵan. О́kinishke qaraı, úıimiz órtengende, janyp ketti. Estaı atam 1939 jyly Almatyǵa bardy. Sol sapardan eki qara chemodan ákeldi. Onyń birin seniń atań Qyzdarbekke, al ekinshisin maǵan tartý etti», – degen edi Zeken apa.
Bizdiń úıde qara chemodannan bólek, Estaı babamyzdan qalǵan taǵy bir mura bar. Ol – aqynnyń turmysta paıdalanǵan bıik ústeli. Aýyldan qalaǵa kósherde kórshimiz Nurbolat Malataıulyna amanattap tapsyryp ketkenbiz. Qazir sol úıde tur.
Farhat ÁMIRENOV, Estaı aqynnyń urpaǵy