Anasy kásibı maman bolmasa da, sýretti jaqsy salypty. Onyń osy tálimin boıyna sińirgen Álııa jeti jasynda qolyna qylqalam ustap, tabıǵattyń tilmen aıtyp jetkizgisiz ǵajaıyp kórinisterin aq qaǵaz betine túsirýden jalyqpapty. Sýret pániniń muǵalimi boıjetkenniń ushqyr qııalyna qanat bitirip, kásiptik baǵyt-baǵdar jaǵynan jetilýine kóp kómektesipti. Sodan bergi ǵumyry beıneleý ónerimen bite qaınasyp keledi.
Álııanyń sheber qolynan shyqqan 300-ge jýyq týyndy sanalýan taqyrypty qamtıdy. Qaı-qaısysynda bolsyn ulttyq naqysh aldymen ańǵarylyp, adam men tabıǵattyń ishki úndestigi, tylsym qubylystary, jumbaq syrlary dombyranyń qos shegindeı úılesim taýyp otyrady. Kóbine akvarelmen salǵandy unatady. Ara-tura maıly boıaýdy da qoldanady. Tabıǵat kórinisteri men adam portretterin keskindegende akademııalyq baǵytty ustanady. Sońǵy kezderi kitap jáne botanıkalyq bezendirýge de den qoıyp júr.
– Ýnıversıtette oqyp júrgende alǵashqy kásibı tyrnaqaldy týyndym kishi inimniń portretin salýǵa arnaldy. Baýyrymmen qulyn-taıdaı tebisip óssem de, bir aıdaı ýaqyt jumsadym. Áke-sheshem shańyraǵynyń tórinde ilýli turǵan portret áli kúnge deıin kózime ystyq kórinedi,–deıdi qylqalam ıesi ótken kezdi qımastyqpen eske alyp.
Tańdaýly týyndylarynyń biri «Kelinniń áni» dep atalady. Bir qolymen besikti, bir qolymen álemdi terbetetin bolashaq ana beınesi arqyly umytylyp bara jatqan halyqtyq salt-dástúrler men ádet-ǵuryptardy ulyqtaýǵa umtylypty. Maıly boıaýmen salǵan «Aýanyń qozǵalysy» shyǵarmasy qazirgi ýaqyttyń jantalas qımylyn sezdirgenimen, qorshaǵan ortaǵa degen meıirimdi, ómir súrýge degen qushtarlyqty ańǵarý qıyn emes. Tapsyrys boıynsha kásipqoı boksshylar Gennadıı Golovkın men Janat Jaqııanovtyń portretterin salyp, «Qoǵamdyq kelisim» memlekettik mekemesi uıymdastyrǵan qaıyrymdylyq keshinde satylymǵa qoıypty. Odan túsken 180 myń teńge naýqas baldyrǵandardyń em-domyna jumsalypty. «Qaıyrymdylyq sharalaryna qatysý – óte saýapty is. Bıyl eki shyǵarmamdy aýksıonǵa qoıamyn. Meniń bastamamdy kásipkerler men óner janashyrlarynyń qoldaýyn ótinemin» deıdi ol.
Álııa Muqysheva búginde Nazarbaev zııatkerlik mektebinde óner sabaǵyn júrgizedi. «Palette» úıirmesine jetekshilik etip, oqýshylardy qylqalamnyń qyr-syryna baýlıdy. Olardyń aldy túrli baıqaýlarǵa qatysyp, olja salyp júr.
О́mir ESQALI, «Egemen Qazaqstan»
Soltústik Qazaqstan oblysy