Bul sýret 1981 jyly túsirilgen. Bıyl qazaq televızııasynyń 60 jyldyǵyna oraı, biraz muraǵat el nazaryna usynylý ústinde. Sol úrdispen bul sýret te óz tarıhynan búgin syr shertpek.
Zamanynda Qazaq televızııasynyń nasıhat habarlary bas redaksııasy eki márte Sosıalıstik Eńbek Eri, shopan ata Jazylbek Qýanyshbaevtyń 80 jasqa tolýyna oraı merekelik habar uıymdastyrǵan bolatyn. Eńbek «marshalynyń» shashbaýyn kóterýge kelgenderge kóz júgirtsek oń jaǵynda Moıynqum aýdandyq partııa komıtetiniń birinshi hatshysy, Stalıngrad maıdanynyń jaýyngeri Aıtbaı Nazarbekov, sol qaptalynda KSRO halyq ártisi Roza Baǵlanova, Qazaq KSR Aýyl sharýashylyǵy mınıstriniń orynbasary Ǵabıden Qurmanov otyr. Onyń sol jaq shetinde dombyrasynyń qulaq kúıin keltirip otyrǵan akter, rejısser Dosqan Joljaqsynovty kóremiz.
Biz búgin sol 1981 jyly «Úsh báıterek» telepovesin jáne «Jazylbek ata» derekti kınofılmin Odaq kórermenderine usynyp jatqan tusta taspaǵa túsip, tasqa basylǵan sýretti tarıhtyń ajaryna, eldiń nazaryna tartý ettik.
Qajy QORǴANULY,
ardager jýrnalıst