QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda ınvestısııalar jáne damý mınıstri Jeńis Qasymbek Prezıdenttiń Bes áleýmettik bastamasyn iske asyrý jónindegi Jol kartasynyń óziniń baǵyttaryna qatysty sharalary týraly baıandady. Bul týraly primeminister.kz habarlady.
Spıkerdiń aıtýynsha, sáýir aıynda «Nurly jer» baǵdarlamasyna ózgerister engiziledi. Olar turǵyn úı qurylysynyń kólemin ulǵaıtý normalary men «Turǵyn úı qurylys jınaq bankiniń» turǵyn úı zaımdaryn berý parametrlerin qaıta qaraýdy qarastyrady.
Sondaı-aq, jeke qurylys salýshylarǵa arnalǵan qurylys alańdaryn daıyndaý úshin turǵyn úıge qatysty ınjenerlik kommýnıkasııalardyń qurylysyn qarjylandyrýdy jyl saıyn 80 mlrd teńgeden 100 mlrd teńgege deıin arttyrýdy qarastyrý usynylady.
Mınıstrlik Prezıdenttiń «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» úshinshi bastamasy boıynsha Jol kartasynyń qosymsha oryndaýshysy.
«Biz 2015 jyly bes klımattyq shaǵyn aýdan boıynsha 5, 7 jáne 9 qabatty jataqhanalardyń 104, 184 jáne 244 orynǵa arnalǵan tıptik jobalaryn ázirledik», — dedi J. Qasymbek.
Mınıstrdiń aıtýynsha, jobalarda bir oryndy jáne eki oryndy bólmeler qarastyrylǵan. Bir sharshy metriniń quny 138,4 myń teńgeden 150,9 myń teńgege deıin bolady. Bilim jáne ǵylym mınıstrligine qajetti qujattar usynylady.
QR IDM-ge Jol kartasynda «Eldi gazben qamtamasyz etýdi jalǵastyrý» besinshi bastamasy boıynsha «Saryarqa» magıstraldi gaz qubyrynyń birinshi kezeńiniń qurylysyna shildede JSQ memlekettik saraptama qorytyndysyn berý tarmaǵy júkteldi.
«Jalpy, Jobalyq-smetalyq qujattama belgilengen merzimnen buryn engizilse, tez arada qarap, tıisti qorytyndysyn shyǵarýǵa daıynbyz», — dep túıindedi J. Qasymbek.