Qazirgi tańda oqýshylardyń ǵylymı, jobalyq kózqarastarynyń qalyptasýyna mekteptegi robot-tehnıka kýrsy óz úlesin qosýda.
Robot-tehnıka STEM-bilim berýdiń mazmunyna mysal bola alady. «STEM» abbrevıatýrasy ǵylym, tehnologııa, ınjenerlik jáne matematıka sózderinen quralǵan. Iаǵnı robot-tehnıka matematıka, fızıka, ınformatıka jáne tehnologııa ǵylymdarynan quralady. Oqýshylar osy pánder boıynsha bilimderin kiriktirip, aqyldy robottar jobalaı alady. Bul árıne, oqýshylarǵa óte qyzyqty.
Balalardyń qyzyǵýshylyqtaryna saı bilim berý úshin sáıkesinshe pedagogtardyń da kásibı biliktilikteri joǵary bolýy kerek. Osy maqsatta «О́rleý» biliktilikti arttyrý ulttyq ortalyǵy» aksıonerlik qoǵamy Batys Qazaqstan oblysy boıynsha pedagog qyzmetkerlerdiń biliktiligin arttyrý ınstıtýtynda byltyrdan beri «Robot-tehnıka negizderi» taqyrybynda 72 saǵattyq kýrs uıymdastyryla bastady. Biliktilikti arttyrý kýrsynyń oqý baǵdarlamasynda Lego Mindstorms EV3 modýli men Arduino UNO mıkrokontrolleriniń múmkindikteri, jumys prınsıpteri jáne fýnksııalary qarastyrylady. Kýrstyń maqsaty – mekteptiń ınformatıka, fızıka jáne matematıka páni muǵalimderiniń robot tehnıka salasyndaǵy bilimderin jetildirý.
Kýrs barysynda tyńdaýshylar shaǵyn toptarǵa birigip jumys isteıdi. Monıtorıngtik saraptama nátıjesinen taqyryp boıynsha tyńdaýshylardyń kópshiligi teorııalyq jaǵynan aqparattanǵandyǵy baıqaldy. Soǵan oraı tyńdaýshylardyń tájirıbelik daǵdylaryn jetildirýge, ár shaǵyn topta fızıka, matematıka jáne ınformatıka pánderi muǵalimderiniń bolýyn qamtamasyz etýge tyrystyq.
Shaǵyn toptarda otyrǵan túrli pán muǵalimderi jańartylǵan bilim berý ıdeıasy boıynsha pikir almasyp, birin-biri baǵalady. Tyńdaýshylarǵa daıyn prezentasııalarmen qatar ınternet resýrstar, shaǵyn jobalarǵa bastaý bolatyn zerthanalyq jumystar usynylady. Tapsyrmalardy oryndaý barysynda ár shaǵyn top shyǵarmashylyq qabiletterin qosyp, basqa toptarmen tájirıbe bólisti. Jattyǵýlardy oryndaýda jańartylǵan formatta bilim berýdiń ádis-tásilderin barynsha qoldanyp, barlyq tyńdaýshyny qamtý kózdeldi. Tyńdaýshylar shaǵyn toptarda Lego jáne Arduino platformalarynda kýrs boıynsha meńgergen tájirıbelik daǵdylaryn qoldanyp, jobalar qurdy. Lego modýlinde óndiristik qajettilikterge saı robottar qurastyryp, belgili bir fýnksııalyq qyzmetter atqarýdy júzege asyrdy. Al Arduino platformasynda ártúrli tetikterdi jekeleı iske qosyp, kúndelikti ómirde kezdestirip júrgen qurylǵylardy jasaqtady.
Mysaly, qozǵalys tetigi arqyly jaryqtyń janýy jáne sónýi, dybys berý arqyly bólmedegi jaryqty iske qosý sııaqty is-qımyldar bar. Qysqa merzimdi kýrsty aıaqtaý kezinde tyńdaýshylardyń kásibı bilim deńgeıin anyqtaý maqsatynda shyǵys saýalnamasy júrgizildi. Saýalnama nátıjesinen tyńdaýshylar biliminiń jetkilikti deńgeıge kóterilgeni baıqaldy. Jańa aqparattar elimizdiń ónerkásip salasyn jasandy ıntellekt tehnologııalary arqyly basqarýdyń irgetasy bolady dep senemin. Iаǵnı robot qurastyrý arqyly oqýshylar tanymdyq, praktıkalyq kózqarastaryn qalyptastyrýmen birge túrli eksperımentter júrgizip, naqty tujyrymdamalar men qorytyndylarǵa qol jetkizedi.
Áskerbek DÁNDIBAEV, tehnıka ǵylymdarynyń magıstri, «О́rleý» biliktilik arttyrý ulttyq ortalyǵy» AQ Batys Qazaqstan oblysy boıynsha pedagogıkalyq qyzmetkerlerdiń biliktiligin arttyrý ınstıtýtynyń kafedra meńgerýshisi