Qazaqstan Respýblıkasynyń Memlekettik hatshysy Gúlshara Ábdiqalyqova Sybaılas jemqorlyqqa qarsy kúres máseleleri jónindegi Azamattyq bastamalardyń II kongresine qatysty.
Is-sharaǵa memlekettik organdar, dıplomatııalyq korpýs, halyqaralyq uıymdar jáne elimizdegi azamattyq qoǵamdastyq ókilderi qatysty. Kongress sybaılas jemqorlyqqa qarsy is-áreket máselesi boıynsha memleket pen qoǵamdy jumyldyratyn biregeı alańǵa aınaldy.
Onyń negizgi mindeti – barlyq deńgeıde, árbir eldi mekende jáne aýyldyq okrýgterde júrgizilip jatqan qoǵamdyq baqylaýdyń basty qaǵıdattaryn ornyqtyrý.
Memlekettik hatshy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýdyń negizgi basymdyǵynyń biri sybaılas jemqorlyqqa qarsy kúres jáne zań ústemdigi ekenin atap ótti.
G.Ábdiqalyqova 2014 jyly Qazaqstan Prezıdenti «múlde tózbeýshilik» ahýalyn qalyptastyrý arqyly sybaılas jemqorlyqqa qarsy qozǵalysqa búkil qoǵamdy tartýǵa baǵyttalǵan Sybaılas jemqorlyqqa qarsy strategııany bekitkenin aıtty. Osy ýaqyt ishinde 64 shara atqarylyp, ákimshilik kedergini azaıtýǵa, turmystyq jemqorlyq deńgeıin tómendetýge eleýli septigin tıgizdi. Máselen, qazir barlyq óńirde azamattarǵa bıýdjet qarajatynyń ıgerilýin, maqsatqa saı qoldanylýyn, áleýmettik nysandar qurylysynyń sapasy men merzimin baqylaýǵa múmkindik beretin Qoǵamdyq baqylaý kartasy iske qosyldy. Elde júrgizilip jatqan sybaılas jemqorlyqqa qarsy saıasatqa degen jurtshylyqtyń senimi kúsheıdi.
Kezekti zańnamalyq ózgerister sybaılas jemqorlyq sıpatyndaǵy quqyq buzýshylyqtyń aldyn alý júıesin jetildirýdiń quqyqtyq negizderin qalyptastyrdy.
Qazaqstan BUU-nyń Sybaılas jemqorlyqqa qarsy konvensııasyn; Uıymdasqan transulttyq qylmysqa qarsy konvensııany; Eýropa keńesiniń qylmystyq áreketterden túsken kiristerdi jymqyrý, anyqtaý, tartyp alý jáne tárkileý týraly konvensııalaryn ratıfıkasııalady.
– Búginde biz «Sybaılas jemqorlyqqa qarsy kúres jónindegi Ystanbul jospary» monıtorınginiń ózara baǵa berýge arnalǵan sýbóńirlik baǵdarlamasyna belsendi túrde atsalysyp otyrmyz, – dedi Memlekettik hatshy.
Sońynda Memlekettik hatshy G.Ábdiqalyqova syndarly oı-pikirlerdiń ortaǵa salynyp, tıimdi dıalog ornaıtynyna nıettestik bildirip, Kongreske qatysýshylarǵa zor tabys tiledi.