Chempıondar lıgasynyń 1/8 fınalynda Ispanııanyń «Barselona» komandasy Ulybrıtanııanyń «Chelsıin» qabyldap, 3:0 esebimen jeńiske jetti.
Kezdesýdiń alǵashqy sátinen-aq alań ıeleri birden shabýylǵa kóshti. Sonyń nátıjesinde Lıonel Messı nebári 3-mınýtta Tıbo Kýrtýa qaqpasynan sańylaý taýyp úlgerdi. Osydan keıin londondyqtar alǵa qaraı «lap» qoıdy. Vıllıan men Azar bastaǵan shabýyl ústi-ústine údeı berdi. Aıyp alańyna qaraı áýelegen árbir dop qaýip týdyryp jatty.
20-mınýtta alańnyń ortalyq tusynda Messı óziniń burynǵy qarsylasy Fransesk Fabregastan dopty tartyp alyp, qaqpa mańyna qaraı umtyldy. Eki-úsh qarsylasynyń qyspaǵynda qalǵandyqtan dopty oń qaptaldan kele qalǵan Osman Dembelege jiberdi. Fransııalyq jartylaı qorǵaýshy joıqyn soqqysymen qaqpany týra kózdep, basymdyqty arttyra tústi. Osylaısha ol «Barselonadaǵy» alǵashqy golyn saldy.
Londondyqtar osydan keıin de qarqynyn báseńdetpedi. Shabýyldarynyń deni qaptaldaǵy Markos Alonso, Vıktor Mozes, Vıllıan sekildi jyldam oıynshylary arqyly órbip jatty. Alǵashqy taım aıaqtalar tusta aıyp dobyn oryndaǵan Markos Alonso toǵyzdyqty kózdegenmen, dop taǵy da baǵanaǵa tıip ketti.
Kezdesýdiń ekinshi bóligi dál osy ssenarıımen jalǵasty. «Chelsı» qaýipti shabýyldardy jıi uıymdastyrǵanmen, katalonııalyq oıynshylar óz múmkindikterin kútýmen boldy. Sondaı sátterdiń birinde Lıonel Messı ekinshi golyn soǵyp úlgerdi. 63-mınýtta Lýıs Sýarestiń pasynan keıin aıyp alańyna engen ol úsh qarsylasynyń arasynan Kýrtýanyń eki aıaǵynyń arasyn dál kózdep, sońǵy dopty saldy. Bul argentınalyq shabýylshynyń Chempıondar lıgasyndaǵy 100-goly boldy.
Úshinshi dop Antonıo Konte shákirtteriniń úmitin sóndirgendeı boldy. Sebebi, osy goldan keıin «Chelsıdiń» ótkir shabýyl uıymdastyrýy saıabyrsyp qaldy. Oıyn sońyna deıin osy esep saqtalyp, kelesi kezeńge «Barselona» joldama aldy. Osylaısha katalon komandasy 11 jyl qatarynan Chempıondar lıgasynyń 1/4 fınalyna shyǵyp, jańa rekord ornatty.
Aıta keterlik taǵy bir jaıt, «Chelsı» beıne bir 2012 jylǵy «Barselonanyń» kúıin qushqandaı áser qaldyrdy. Gol soǵar sátteri kóp bolǵanmen sáttilik serik bolmady. Al «kók-anarlar» saýatty qorǵanyp, múmkindikterin tıimdi paıdalana bildi.