Talanttar kóbinese aýylda týady. О́z taqyrybynyń ortasynda ómir súrip jatqan ǵajaıyp sýretshiler de bar. Temirden túıin túıgen nebir ustalar men zergerler de elimen etene ómir súrip jatyr. Áýelegen daýysy týǵan jerinen aspaǵan ǵajap kúmis kómeı ánshiler tabylady. Taǵdyr degen osy. Baq degen kimdi izdep tabady. Dańq pen ataq ta jazmysh boıynsha adamyn izdep tabady eken-aý.
Qarap otyrsaq, kishkentaı ǵana aýyldardyń óz tirshiligi men tanymal da syıly jandary, óz «Qojanasyrlary» bar. О́zderinshe dáýren keship, dáýirden ótedi.
Qyzylordalyq baıyrǵy fototilshi Bolat Omarálıevtiń shyǵarmashylyq qorjyny dál osyndaı tanylmaı ótken birtýar jandardyń taǵdyryna toly.
– 2000 jyldary gazet tapsyrmasymen Qyzylorda oblysy, Syrdarııa aýdanyndaǵy Sáken Seıfýllın atyndaǵy sharýashylyqta júrgenmin. Kúrish oraǵynyń kúıip turǵan ýaǵy. Biz fotoreportaj jasamaq bolyp, kúrish jınaıtyn qoımanyń aldyna barsaq, biraz adam yrdý-dyrdý bolyp, shýlasyp jatyr jatyr eken.
Jaqyndap barsam, myna sýrettegi Kópbol degen jigittiń moınyna qurdastary árqaısysy 50 kılolyq úsh qapty artyp qoıypty. Biz endi ǵana tórtinshi qapty arqasyna salaıyn dep turǵan jerine tap kelippiz.
– Al salyńdar, salyńdar!, – dep dáý qara da qyzýlanyp qoımaıdy. Júzi kúlim qaǵady. Moınyndaǵy úsh birdeı qapty shybyn qonǵandaı elep turǵan túri joq. Qaýmalap turǵandardan surasaq, Kópbol degen aýyldyń aýyrdy myńq demeı arqalap júre beretin azamaty ekenin bilgendeı boldyq.
Sol kezde Kópboldyń áıeli kelip qaldy da:
– Oıbaı, toqta, tasta ana qaptardy! Belin syndyrasyńdar! Buǵan báribir, taǵy on qap salsańdar da máz bop tura beredi. Densaýlyq senderge emes, oǵan kerek qoı, – dep shynynda da shyj-byj boldy. Jınalǵandardyń bireýi kúlip, bireýi taǵy qansha qap kóteredi degendeı, áttegen-aılaryn aıtyp, shýlasyp jatyr.
Moınyndaǵy qaptarynan bosaǵan sátinde, Kópboldan suraımyz ǵoı:
– Baýyrym, shtanga, kúreske bardyń ba? Basqa da sport túrlerine qatystyń ba?
– Oıbaı joq! Neniń sporty?! Meniń sportym kúrish qoımasynyń 50 kılolyq qaptary ǵoı. Qaıbir jyly kınoǵa túsýge shaqyrǵan, biraq barǵan joqpyn.
– Nege barmadyńyz? – deımiz biz de qoımaı.
– Oryssha bilmeımin, – dep rııazsyz yrjıyp kúldi.
Sol Kópboldy bir-eki jyl buryn qaıtys boldy dep estidim. Neden qaıtys bolǵanynan habarym bolmady, deıdi sýrettiń avtory.
Bul da bir ómir!
Aınash ESALI,
«Egemen Qazaqstan»
ALMATY
Sýretti túsirgen Bolat OMARÁLIEV