Astanada Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń konferensııasy ótti. Is-sharaǵa Memlekettik hatshy, Qazaqstan Prezıdenti janyndaǵy Jastar saıasaty jónindegi keńestiń tóraǵasy Gúlshara Ábdiqalyqova, QHA Tóraǵasynyń orynbasary – Hatshylyq meńgerýshisi Leonıd Prokopenko, Din isteri jáne azamattyq qoǵam mınıstri Nurlan Ermekbaev, Májilis depýtattary, respýblıkalyq jastar birlestigi men «100 jańa esim» jobasynyń jeńimpazdary qatysty.
Konferensııadaǵy alǵysózinde G.Ábdiqalyqova Nursultan Nazarbaevtyń «Prezıdenttiń bes áleýmettik bastamasy» atty halyqqa Úndeýindegi «Men órkendegen Qazaqstan – eń aldymen memleketi ózin qorǵap, qoldaıtynyn, qamqorlyq jasaıtynyn sezinetin, tıisinshe elin jan júregimen súıetin, ózderine senimdi adamdar dep sanaımyn» degen Elbasy sózin mysalǵa keltire otyryp, qazaqstandyqtardyń aýqymdy áleýmettik jańǵyrýǵa qadam basqanyn atap ótti.
«Osynaý ózekti Prezıdenttik bastamalar ulttyń baqýattylyǵynyń negizi bolyp tabylatyn áleýmettik birlikti nyǵaıtýǵa baǵyttalyp otyr. Joba eń aldymen jastarǵa arnalýynyń ózi kezdeısoqtyq emes. О́ıtkeni jastar keleshekte eldiń damýynyń naqty qadamdaryn anyqtaıdy. Sondyqtan «Jańǵyrý joly» qozǵalysynyń qurylýy Qazaqstannyń jastardy qoldaýynyń kórinisi. Qozǵalystyń negizgi mindeti belsendi jastardyń basyn biriktire otyryp, «Rýhanı jańǵyrý» baǵdarlamasyndaǵy tapsyrmalardy iske asyrýǵa úles qosýy tıis», dedi Memlekettik hatshy.
– «Jańǵyrý joly» jastar qozǵalysynyń qurylǵan kúni Naýryz merekesimen tuspa-tus kelýiniń sımvolıkalyq máni zor. Jastarmen birigip jumys isteýge Qazaqstan halqy Assambleıasy basa mán berip keledi. Jastar qozǵalysynyń mundaı formaty qoǵamdyq sanany jańǵyrtý mindetin iske asyrýdyń dálme-dál beınesi. Jańǵyrý joly – jastar joly, – degen L.Prokopenko qozǵalystyń negizgi maqsattary men mindetteri jóninde keńinen áńgimelep berdi. О́z sózinde ol, Memleket basshysynyń batyl qadamy jastardyń damýy úshin áleýmettik, ekonomıkalyq lıft bolyp otyrǵanyn atap ótti. Assambleıanyń jastar qozǵalysy osyndaı bastamalarǵa qoldaý kórsetýde senimdi áriptes bolmaq.
Qatysýshylar aldynda sóılegen sózinde Nurlan Ermekbaev jastardyń ózekti máselelerine toqtalyp ótip, onyń ishinde jastarǵa únemi ózderiniń qabiletterin damytyp, jańa bilim kózderin meńgerýge, sondaı-aq ózin-ózi jetildirýge keńes berdi.
«Tek jan-jaqty damyǵan, bilimdi, erkin oılaı alatyn jastardyń arqasynda ǵana bizdiń elimiz damýdyń dańǵyl jolyna shyǵady. Sondyqtan qazirgi zamanaýı úrdisterdi eskere otyryp, jastar únemi jańa bilim kózderin izdestirýge, ózin-ózi tárbıeleýge jáne qabiletterin damytýǵa, ýaqytqa baılanysty jyldam ózgeretin álemde jańa baılanystardy ornatýǵa umtylýlary tıis» - dep atap ótti Nurlan Ermekbaev.
Mınıstrdiń aıtýynsha, «Prezıdenttiń bes áleýmettik bastamasy» jastardyń úlken ómirge qanat qaǵýyna senimdi negiz bola alady. Jańa «7-20-25» ıpotekalyq baǵdarlamasy barlyq qyzmetkerlerge, tipti jalaqysy tómen bolsa da, óz baspanalaryn alýǵa múmkindik beredi. Qosymsha 20 myń grant bólý jáne 75 myń orynǵa arnalǵan stýdenttik jataqhanalar salý aýyldar men shaǵyn qalalardaǵy jastardyń Qazaqstannyń jetekshi bilim berý ortalyqtarynda oqýǵa túsý qoljetimdiligin jeńildetedi, sondaı-aq ýnıversıtetter men kolledjderdiń stýdentteri úshin turǵyn úı máselesin sheshedi.
Jıyn barysynda kópshiliktiń qoldaýymen qozǵalys tóraǵasy bolyp saılanǵan QHA múshesi Maksım Spotkaıǵa QHA Tóraǵasynyń orynbasary - Hatshylyq meńgerýshisi Leonıd Prokopenko Assambleıanyń týyn tabystady.
«Qazirgi tańda elimizde saıası, ekonomıkalyq, áleýmettik jáne rýhanı jańǵyrý prosesteri júrip jatyr. Osyǵan baılanysty saıası, ekonomıkalyq, qoǵamdyq kúshterdiń barlyǵyn Memleket basshysy ıdeıasynyń tóńiregine toptastyrý qajet. Sondyqtan, biz Astana, Almaty men Qazaqstannyń barlyq óńirlerindegi etnomádenı birlestikterdiń jastary QHA-nyń jastarǵa qatysty barlyq qoǵamdyq uıymdarynyń birigýimen «Jańǵyrý joly» respýblıkalyq jastar qozǵalysyn qurý týraly týraly sheshimge keldik. Erikti qozǵalysqa Qazaqstannyń kez kelgen azamaty múshe bolyp, qatysa alady», – deıdi atalǵan qozǵalystyń tóraǵasy Maksım Spotkaı. Jıyn sońynda «Jańǵyrý joly» qozǵalysynyń 2018-2020 jyldarǵa arnalǵan strategııasy bekitilip, is-sharalar jospary kelisildi.
Aıa О́MIRTAI,
«Egemen Qazaqstan