Aral qalasynda Jarokov kóshesindegi ekiqabatty úıdi bólip turǵan bóligi opyryldy. Zardap shekkender joq, dep habarlaıdy Qyzylorda oblysynyń baspasóz qyzmeti.
Ǵımarat 1986 jyly balabaqsha retinde salynyp, 90-jyldary turǵyn úı maqsatynda paıdalanýǵa berilgen.
Alaıda, jergilikti basshylyq tarapynan nysannyń apatty ekeni birneshe ret eskertilgenine qaramastan, turǵyndar úıdi ıemdenip, qonystanyp alǵan. Qazirgi tańda 20 páterli úıdiń beseýinde adam turmaıtyny anyqtaldy. Kúrdeli jóndeýden ótkizý qajet eken.
Búgingi tańda, oqıǵa oryn alǵan jerde tıisti jumystar atqarylýda, 50 adam jáne 3 aýyr tehnıka jumyldyryldy. 15 otbasynyń 8-i aýdandyq jastar resýrstyq ortalyǵyna evakýasııalandy, qalǵan 7 otbasy ǵımarattyń qaýipsiz aýmaǵynda turyp jatyr. Evakýasııalanǵan turǵyndar ystyq tamaq jáne dári-dármekpen qamtamasyz etildi.
Aýdan ákiminiń tapsyrmasymen arnaıy komıssııa quryldy, aldaǵy ýaqytta tekserý júrgiziledi.