Bul mekemeniń bosaǵasynan áleýmettik ártúrli toptaǵy azamattar kún saıyn ondap, júzdep attaıdy. Esikten kire aıqaılap nemese biraýyz sózge kelmeı daýys kóteretin azamattarmen, sondaı-aq densaýlyǵyna baılanysty júıkesi syr bergen múgedek jandarmen kúndelikti jumys isteý de ońaı emes.
– Áleýmettik qorǵaýdy talap etetin turǵyndar tobynyń bizdiń tarapymyzdan árqashan da jylylyq kútýi tabıǵı zańdylyq, óıtkeni, bizdiń kásibı mekemeniń atqaratyn qyzmet ólshemi olarǵa tek qana laıyqty qolǵabys kórsetý, járdem berý sapasymen baǵalanady, – deıdi Áýezov aýdandyq Memlekettik zeınetaqy tóleý ortalyǵynyń basshysy Álııa Dúısebaıqyzy Maqulbaeva. – Jyl basy Naýryz merekesiniń qarsańynda bizdiń ujymnyń ádettegi eńbek yrǵaǵyn eselep, jyl boıy jańasha leppen eńbek etýi de sondyqtan.
Kún men tún teńesetin aıtýly jyl mezetinde, Tabıǵat-Anamyzdyń emirenip meıirimin shashyp jatqan sátinde Álııa men onyń áriptesteri mekemege úmitpen bas suqqan barlyq janǵa jyly qabaq tanytyp, árqaısysymen jaıly sóılesýge beıim. Almaty qalasynyń Áýezov aýdanynda ornalasqan bul ortalyq dál búgin qala aýmaǵyndaǵy eń kóp sanalatyn 50 myńǵa jýyq adamǵa jyl boıy ýaqytpen sanaspaı qaltqysyz qyzmet kórsetedi. Jyl saıyn sany ulǵaıyp, qatary ósip, qosylyp jatqan áleýmettik topqa memleket tarapynan kórsetiletin kómek qory odan da molaıyp, arta túsýde. Memleket tarapynan beriletin jeńildikter men járdemaqylardy jańadan qabyldanyp, ózgerip, tolyqtyrylyp jatqan zań talaptaryna saı rettep-resimdep, qattap-qujattap, ıesine tap-tuıneaqtaı etip tabystaý – Álııa men onyń áriptesteriniń qolynda. Ujym quramynda negizinen 37 qyz-kelinshek qyzmet atqarady. Olardyń orta jasy – 25!
Bar qyzmet tikeleı kompıýterlik júıe, ınternettik jeli arqyly júzege asady. Bul arada arhıvpen jumys isteý isi de asqan biliktilik pen tabandylyqty talap etetinin de atap ótken jón. Ortalyqqa bas suǵatyn áleýmettik toptar sanatyndaǵy, atap aıtqanda – zeınet jasyna jetken jáne zeınet jasyndaǵy azamattar, ekiqabat áıelder, ártúrli múgedektik toptaǵy qala turǵyndary tobynda eshýaqytta shek bolǵan emes. Álııa Maqulbaeva basqarǵan ujymnyń basty ustanymy – mekeme esigin ashqan bir de bir adamnyń kóńiline tıtteı de qaıaý túspeýi tıis. «Biz halyqqa árdaıym da laıyqty qyzmet úlgisin kórsetemiz!»
...Jap-jas ujymnyń jyldyń kóktem aıyndaǵy osy merzimin máre syzyǵyndaı etip tańdap alýy –olardyń tikeleı erekshe kásibı qyzmetterine baılanysty. Shýaq shashqan Naýryz kúnderi bul mekemege bas suqqan áleýmettik toptaǵy árbir jan ónegeli qyzmet úlgisin kórip, júregine meıirim uıalatsa eken, deıdi olar.
Talǵat SÚIINBAI,
«Egemen Qazaqstan»
Sýretterdi túsirgen Nurmanbet QIZATULY
ALMATY