«Qazaqkonsert» memlekettik konserttik uıymynyń Jańa jyl – áz Naýryz merekesine josparlaǵan jańashyl bastamalary óte kóp. Onyń deni «Rýhanı jańǵyrý» baǵdarlamasy jáne Astananyń 20 jyldyq mereıtoıyna oraılastyryp uıymdastyrylýda.
Mádenıet jáne sport mınıstri Arystanbek Muhamedıulynyń «Egemen Qazaqstan» gazeti betinde Naýryz meıramyn jańashyl baǵyt, ulttyq úlgide toılaýǵa qatysty joldanǵan birqatar tyń oılary uıym jumysynyń da aldaǵy josparlaryna úlken serpin berip, jańa bastamalarǵa sebepshi bolyp otyr. Osy oraıda atalmysh usynysty qoldaý jáne júzege asyrý maqsatynda «Qazaqkonsert» memlekettik konserttik birlestiginiń dırektory Jeńis Seıdýllauly óner ujymynyń aldaǵy jumys barysy men «Qazaqstan» Ortalyq konsert zaly ǵımaratynyń erekshelikterin tanystyrýǵa arnalǵan press-týr ótkizip, shyǵarmashylyq oılarymen bólisti. Álemdegi ozyq tehnologııalyq jetistikterdi esepke ala otyryp boı kótergen sáýletti ǵımarat – «Qazaqstan» ortalyq konsert zalynyń ishinde qyzmet etip jatqan birneshe shyǵarmashylyq ujym jumysy jekeleı tanystyryldy. Sonyń ishinde, ásirese, Astana Musical teatrynyń sahnalyq izdenisteri jáne ulystyń uly kúni Naýryz meıramy men elordanyń 20 jyldyq mereıtoıyna oraı 20-27 naýryz aralyǵynda Almaty qalasyna josparlanǵan gastroldik sapar baǵdarlamasy da kópshilik nazaryna usynyldy.
Astana Musical – elimizdegi jáne Ortalyq Azııadaǵy tuńǵysh mamandandyrylǵan mıýzıkl teatry. Zamanaýı teatr óneri baǵyttaryn óz tájirıbesinde utymdy qoldanyp júrgen jas teatr búginde respýblıka aýmaǵynan bólek, Fransııa, Belgııa, Aýstrııa, Reseı syndy birneshe memleketti de óz talantymen tánti etip qaıtty. «Dostar serti», «Er Tóstik», «Romeo men Djýletta», «Qyz Jibek» syndy álemdik klassıka men tól dramatýrgııamyzdyń jaýharlaryn da sátti sahnalap júrgen jas teatrdyń Almaty qalasyna aparar gastroldik baǵdarlamasy da ózindik mazmunymen qyzyqty. О́ner ujymy, sondaı-aq aldaǵy ýaqyttaǵy álemniń ozyq mıýzıklderin qazaq sahnasyna ákelý josparlaryn da ortaǵa salyp, shyǵarmashylyq jumystarynyń qyr-syrymen bólisti.
«Qazaqkonsert» memlekettik konserttik uıymynyń qazaq ónerin damytý, jeke oryndaýshylar men jas talanttardyń shyǵarmashylyq izdenisterin qalyń kórermenmen qaýyshtyrýda jasap jatqan jumysy orasan. Ujymnyń jańa dırektory Jeńis Seıdýllaulynyń málimdeýinshe, birlestik aldaǵy ýaqytta da osy qarqynyn joǵaltpaı, elimizdiń túkpir-túkpirin aralap óner kórsetýmen qatar, qazaq mýzykasy men teatr ónerin álem deńgeıine kóterýge barynsha kóńil bólinetindigin atap ótti. Kezdesý sońynda «Qazaqstan» ortalyq konsert zalynyń ishine arnaıy ekskýrsııa jasalyp, jıynǵa qatysqan BAQ ókilderi men joǵary oqý oryndarynyń ustazdary, pedagog ǵalymdar talantty grımer, músinshi Aıdos Esmaǵanbetovtiń sheberhanasymen tanysty.
Nazerke JUMABAI,
«Egemen Qazaqstan»