Almaty qalasynyń ardagerleri Elbasy – Qazaqstan Respýblıkasynyń Prezıdenti Nursultan Nazarbaevtyń «Bes áleýmettik bastamasyn» asqan rızashylyqpen qarsy aldy.
«О́tkenge qarap, erteńińdi túze» degen ósıet bar, sebebi ótkenniń ónegesi – búginginiń baǵa jetpes baılyǵy» deıdi óz sózinde Elbasy. Shyntýaıtynda, bul bastama eń aldymen halqymyzdyń áleýmettik jaǵdaıyn jaqsartýǵa aıryqsha septigin tıgizedi dep oılaımyn. Ásirese, óz basym jas urpaqqa kórsetiletin qamqorlyqtyń baǵyt-baǵamyn qatty sezindim.
Árige barmaı-aq táýelsizdigimizdiń týyn kótergen osynaý shırek ǵasyrdyń sheńberinde bolyp jatqan, bolyp ótken qoǵamdyq qubylystardy saralap kóreıikshi. Qoǵam ózgerip, jańa satyǵa kóterildi. Búgingi jas urpaq keshegi dáýirlegen keńestik zamannyń ómir ótkelderinen múldem beıhabar. Elimizdiń joǵary oryndarynda eńbek etken, basqarǵan kezeńder kóz aldymda, bilim qýǵan jas óskin qolyna dıplomy tıgen sátten bastap otbasyn quryp, baspanaly bolǵysy keledi. Jasyratyny joq, munyń adam aıtqysyz qıyndyqtary bar edi. Qalypty jaǵdaımen bankige bas suqqan jas maman nesıe alý úshin tıisti jalaqysyn tutastaı berse de oǵan qol jetkize almaıtyn. Sondyqtan da Prezıdenttiń «7 – 20 – 25» baǵdarlamasy – búgingi kúnniń eń ózekti máselesi ári ol endigide naqty sheshimin tapqandaı. Endi baspanaǵa qoly jete almaı júrgen qansha jas otbasy úshin negizinen ıpotekalyq zaım alýdyń múmkindigi týdy. Bizdi qýantqany da osy edi. Elbasynyń el ómirindegi teńdessiz bul bastamasy shyn máninde qoǵamda úlken serpilis týǵyzatyny daýsyz. Bir Almatynyń ózinde qanshama turǵyn úı salynyp bitti. Salynatyny qanshama?!
Demek keshegi aýdıtorııada ózim dáris oqyǵan elimizdiń bolashaǵy úshin bul ózi eń bir jaıly ári jaǵymdy kezeń boldy dep túıip otyrýymnyń sebebi de sol. Qazaqta «Úı bolmaı, kúı bolmaıdy» degen maqal bar. Baspanaly bolǵan jastarymyzdyń taý qoparyp, tasty jaratynyna senemin.
Qalalyq ardagerler uıymynyń tynys-tirshiligi kóz aldymda ótip jatyr. El basshysynyń halyqqa Úndeýiniń kókeıtestiligin sol kúni-aq ardagerler qaýymdastyǵy talqylap ta tastadyq. Bolashaǵymyz, jastarymyz úshin qýandyq. Ýaqytty sozbaı el Úkimetiniń Prezıdent bastamasyn júzege asyrýdyń memlekettik naqty sharalaryn qarastyryp, júzege asyrýdyń baǵdarlamalaryn jasaı bastaǵany da asa quptarlyq is. Jastar – bizdiń erteńimiz. Bes bastamanyń ishindegi barshamyzǵa eń jaqyny týraly búgingi oı qozǵaýymnyń sebebi de sol. Eldegi yrys pen yntymaqtyń arqasynda Otanymyz kórkeıip, ósip keledi. Al adam kapıtaly – onyń sheshýshi tarmaǵy. Úndeýde osy uǵymǵa asa basymdyq berilýi de sondyqtan dep oılaımyn.
Erenǵaıyp ShAIHÝTDINOV, qalalyq ardagerler keńesiniń tóraǵasy
ALMATY