Kóktem! «Jan-janýar adamzat antalasa, Ata-anadaı eljirer kúnniń kózi» dep Abaı atamyz aıtqandaı, bul barsha tabıǵattyń júıe-júıesi bosap keńip sala bergen tynysynan tyń tirshilik búr jarar ǵajaıyp shaq. Bul kezde kisi kóńili de kókke umtylǵan kók óskindeı qulpyryp, jasańǵyrap qalady. Osyndaı sátte qala turǵyndary men qonaqtaryna tipti de jarqyn kóńil-kúı syılaý úshin elordadaǵy Qazaqstan Respýblıkasy Ulttyq mýzeıi «Sezimderdi jańǵyrtyp...» atty sýret kórmesin ashty.
Kórmege tabıǵattyń kún men tún teńelgen Naýryz merekesin toılaýdyń ulttyq dástúrlerin boıyna jylý taraı bastaǵan tabıǵattyń erekshe shýaqty shaǵyn beıneleıtin, 50-den astam kartına men músin qoıylǵan. Bulardyń kópshiligi peızajdyń qarapaıym janrymen berilipti. Eń bir tartymdylyǵy árbir kórkem sýretten qazaq mádenıetiniń dúnıetanymdyq jáne fılosofııalyq túsinikteriniń shoǵyrlanǵanyn kórýge bolady.
«Symbatty óner bolmaǵan elde maǵynaly tirshilik joq. Qandaı qaýym, qandaı tapty alsaq ta qany men janynyń sýretin óner aınasyna túsirmeı otyra almaıdy. О́nerden qýat almasa, tirshiliktiń shyraǵy óshedi» degen ǵulama Muhtar Áýezovtiń sózi dál osy tusta kókeıińe eriksiz oralady. Kórmede usynylǵan týyndylar ulttyq rýhqa, tabıǵatqa degen súıispenshilik, baqytty balalyqtyń tátti elesterine óte baı. Keıbir sýretshiler kóktemniń jaqyndaýyn tústerdiń biliner-bilinbes almasýymen berse, endi bireýleri kóktemgi shattyq sezimdi beınelegen.
Kórmege Erlan Aıtýarov, Májıt Baıtenov, Tileýjan Batanov, Baqytnur Býrdesbekov, Erlan Nazarkul syndy tanymal sýretshilermen birge Anar Áýbákir, Gúlmaral Tátibaeva, Ásem Abdýllaeva syndy jastardyń da jumystary qoıylǵan.
«Bul kórmeniń bir ereksheligi aǵa býyn men jastardyń sabaqtastyǵyn kórsetýmen qatar, barlyq janrdy qamtýynda. Naýryzdyń kelýine oraı uıymdastyrylýynyń mańyzy zor. Soǵan oraı merekelik kóńil-kúıdi beıneleıtin sýretter kóbirek qoıylypty. Bul sýretshilerdi shabyttandyrady», deıdi Qazaqstannyń eńbek sińirgen qaıratkeri sýretshi Tileýjan Batanov.
Shynynda munda tek kórkem tabıǵat, aýyl tirligin ǵana beınelep qoımaı, qala kókteminiń de erekshe áserin myń boıaýmen jetkizgen týyndylar jeterlik eken. Mysaly, Seısenhan Mahanbetovtiń «Arý qala – Astana», «Natıýrmort» jáne ózge de kartınalary soǵan dálel. Kórmedegi maıtalman sýretshi Erlan Aıtýarovtyń «Kúı» kartınasy jeti notany jeti boıaýmen beınelegen erekshe týyndy desek bolatyndaı.
Ularbek NURǴALYMULY, «Egemen Qazaqstan»