Jambyl oblystyq «Aq jol» gazetiniń bastamasymen 1 naýryzdan bastap «Naýryz – izgilik aıy» aksııasy qolǵa alynǵan bolatyn. Atalmysh shara aıasynda redaksııa ujymy oblys jurtshylyǵyn qaıyrymdylyq jasap, aınalaǵa meıirimdilik nuryn sebýge atsalysýǵa úndeýde.
Osyǵan oraı, basylym qyzmetkerleri aımaqtaǵy turmysy tómen, qoldaýǵa muqtaj jandardyń tizimin tıisti mekemeden alyp, qaıyrymdylyqqa baǵyttalǵan jumystar retin bastap ketken bolatyn. Nátıjesinde, óńirdegi áleýmettik jaǵynan az qamtylǵan, qoldaýǵa muqtaj, múgedek balalary bar otbasylardyń qajettilikteri eskerile otyryp, kómek qoly sozyldy. Osylaısha, aksııa aıasynda 3 aptaǵa jýyq ýaqyt ishinde 30-ǵa jýyq otbasyna qamqorlyq kórsetildi.
«Aq jol» gazetiniń redaksııasy tek qaıyrymdylyq sharalarymen shektelmeı, ózge de izgi isterdi qolǵa alǵanyn aıtyp ótýimiz kerek. Máselen, ulystyń uly kúni qarsańynda gazet redaksııasynyń muryndyq bolýymen Taraz qalasyndaǵy «Úmit» mamandandyrylǵan bóbekter úıiniń qamqorlyǵyndaǵy jeti balanyń tusaýy kesildi.
Mereke qarsańynda baldyrǵandarǵa qýanysh syılaý maqsatynda atalmysh shara qolǵa alynyp, oblys baspasóziniń qara shańyraǵynda tuńǵysh ret ata dástúrimizge saı tusaýkeser rásimi ótip otyr. Onda esimi elge tanymal, óz salasynda jetistikke jetip, abyroı-bedelge ıe bolǵan azamattar taǵdyrdyń jazýymen ata-ananyń qamqorlyǵynan shet qalǵan sábılerdiń tusaýyn kesip, aldaǵy ómirlerine aq jol tiledi.
Igi sharany «Aq jol» gazetiniń dırektor-bas redaktory Qýat Áýesbaı ashyp, sharanyń mán-mańyzyn túsindirip ótti.
– Ulystyń uly kúniniń qarsańynda redaksııanyń bastamasymen qolǵa alynǵan «Naýryz – izgilik aıy» aksııasynyń jalǵasy retinde tusaýkeser sharasyn ótkizip otyrmyz. Ondaǵy maqsatymyzdyń biri ata-ananyń aıaly alaqanynyń jylýyn sezinbeı ósken balalarǵa qýanysh syılaý bolsa, ekinshisi olarǵa elimizdiń, oblysymyzdyń damýyna eleýli úles qosqan, eńbegimen bıikterdi baǵyndyrǵan azamattardyń jolyn bersin, solardyń izin bassyn degen nıet edi. Aldaǵy ýaqytta bul bastama jalǵasyn taýyp, dástúrli túrde ótedi degen nıetimiz bar, – dedi Qýat Áýesbaıuly.
Sharada áýeli toqsannyń tórine shyqqan ardager jýrnalıst, oblystyń aǵa basylymyn jıyrma jyl basqarǵan qarymdy qalamger Battal Jańabaev búldirshinderge batasyn berip, atalyq aq tilegin arnady.
– Halqyna adal qyzmet etetin, qanaty talmaıtyn suńqar, tuıaǵy muqalmaıtyn tulpar bolyńdar! О́mirleriń qýatty, ár kúnderiń shýaqty bolýyn tileımin. О́mirde ne tileseńder de qabyl bolyp, elińniń eleýli, halqyńnyń qalaýly ul-qyzdaryna aınalyńdar! Týǵan jerlerińniń betkeustarlary degende senderdiń attaryń atalyp, jurt sendermen maqtanatyndaı abyroıǵa ıe bolyńdar! – dep batasyn berdi Battal Jańabaıuly.
Sondaı-aq elimizge belgili jazýshy, «Jambyl» respýblıkalyq jýrnalynyń bas redaktory, Halyqaralyq «Alash» ádebı syılyǵynyń laýreaty Nesipbek Dáýtaıuly, oblystyq «Znamıa trýda» gazetiniń dırektor-bas redaktory Beket Momynqul, «JAMBYL» telearnasynyń dırektory Jasulan Ábdihalyq, Taraz qalasynyń jáne Baızaq aýdanynyń Qurmetti azamaty Ońlasyn Esirkepov, oblystyq ardagerler keńesi tóraǵasynyń orynbasary Sansyzbaı Jorabekov, «Salyq tártibi» gazetiniń bas redaktory Ǵalym Qasabaı aqjarma tilekterin aıtyp, búldirshinderdiń tusaýyn kesti. Qadamdarynyń qutty bolýyn tilep, ómir atty uzaq jolda súrinbeı, aq joldan adaspaýlaryna tilektestik bildirdi.
«Jambyl-Taraz» gazeti dırektorynyń mindetin atqarýshy Erman Ábdıev, «Araı» gazetiniń jaýapty hatshysy Jasulan Seıilhan baldyrǵandarǵa barsha jaqsy nıetterin arnady. О́z kezeginde QR eńbek sińirgen qaıratkeri Asylhan Shúńirekov búldirshinderge tilegin án shashýymen jetkizdi.
Shara sońynda «Úmit» mamandandyrylǵan bóbekter úıiniń qyzmetkerleri osyndaı ıgi sharany qolǵa alyp, ótkizip otyrǵan «Aq jol» gazetiniń redaksııasyna alǵystaryn bildirdi.
– Áz Naýryzdyń qarsańynda ótkizilip otyrǵan bul tusaýkeser rásimi barlyǵymyz úshin este qalar shara boldy. Árıne, qazaq balasynyń tusaýyn kez kelgen adamǵa kestirmegen. Bul rette, bóbekter úıi tárbıelenýshileriniń tusaýyn oblysymyzǵa belgili, eńbegimen eline elengen azamattar kesip otyr. Biz de baldyrǵandardyń osy atalaryna uqsap, halqyna qaltqysyz qyzmet etetin abyroıly azamattar bolyp óssin dep tileımiz. Osy oraıda, ıgi iske muryndyq bolyp, uıymdastyrǵan basylym ujymyna alǵysymyz sheksiz, – dedi bóbekter úıiniń ádiskeri Altynshash Álisherı.
Murathan ÁLIMHAN