Sankt – Peterbýrg qalasynda QR Tuńǵysh Prezıdenti - Elbasynyń Qory jáne Sankt-Peterbýrg Memlekettik Ýnıversıteti arasynda Qazaqstan Respýblıkasynyń Sankt-Peterbýrg qalasyndaǵy Bas Konsýldyqtyń qoldaýymen yntymaqtastyq týraly memorandýmǵa qol qoıyldy.
QR Tuńǵysh Prezıdenti – Elbasy Qory jetekshi ǵylymı ortalyqtarmen jáne joǵary oqý oryndarymen áriptestik qarym-qatynas ornatýda. Qazaqstan men Reseı arasyndaǵy strategııalyq áriptestikti eskere otyryp, daryndy jastardy qoldaý jáne biliktiligi joǵary kadrlar daıarlaý sııaqty gýmanıtarlyq yntymaqtastyq salasyndaǵy is-sharalardyń eki jaqqa da mańyzy erekshe.
Sonymen, Memorandýmnyń basty maqsaty ǵylym, bilim berý, mádenıet jáne jastar bastamalaryn qoldaý salasyndaǵy yntymaqtastyqty nyǵaıtý jáne damytý bolyp tabylady.
Eki jaqty yntymaqtastyqtyń negizgi baǵyttary ǵylym, bilim berý, mádenıet jáne daryndy jastardy qoldaý bolyp tabylady, atap aıtqanda zertteýshiler jáne stýdenttermen almasý; ýnıversıtetter, zertteý ortalyqtary jáne basqa da mekemeler arasynda tikeleı baılanysty jáne yntymaqtastyqty damytý; konferensııalar, semınarlar, tusaýkeserler, dóńgelek ústelder jáne ózge de ǵylym, bilim berý jáne mádenıet salasyndaǵy is-sharalardy ótkizý. Sondaı-aq daryndy jastardy qoldaý maqsatynda ataýly stıpendııalar taǵaıyndaý múmkindigi qaralady.
Memorandýmǵa qol qoıýǵa Qazaqstan Respýblıkasynyń Sankt-Peterbýrg qalasyndaǵy Bas Konsýly Bolat Imanbaev, QR Tuńǵysh Prezıdenti - Elbasy Qorynyń atqarýshy dırektorynyń orynbasary Igor Rogov jáne Sankt-Peterbýrg Memlekettik Ýnıversıtetiniń rektory Nıkolaı Kropachev qatysty.
Sonymen birge, Qordyń atqarýshy dırektorynyń orynbasary, zań ǵylymdarynyń doktory, QR Konstıtýsııalyq Keńesiniń burynǵy tóraǵasy (2004-2017 jj.) Igor Rogov Qazaqstannyń quqyqtyq damý salasyndaǵy jetistikterine jáne Qazaqstan Respýblıkasynyń Prezıdenti N. Á. Nazarbaevtyń syrtqy saıası bastamalaryna arnalǵan leksııa ótkizdi. Leksııaǵa Sankt – Peterbýrg Memlekettik ýnıversıtetiniń 100 –den asa stýdentteri jáne Sankt-Peterbýrg qalasyndaǵy joǵary oqý oryndarynda oqıtyn qazaqstandyq stýdentter qatysty.