Astana qalasynyń Kongress Ortalyǵynda ulystyń uly kúni – Naýryz meıramyn toılaýǵa arnalǵan merekelik konsert ótti. Saltanatty is-sharaǵa Memleket basshysy Nursultan Nazarbaev qatysyp, barsha qazaq elin kóktemniń shýaqty merekesimen quttyqtady.
Konsert baǵdarlamasyna sáıkes, eń aldymen «Jańarǵan jer, baq qonǵan nurly el» mıýzıkli kópshilik nazaryna usynyldy. Bul kópjanrly jobaǵa Astana qalasynyń barlyq mádenı óner oshaqtarynan jasaqtalǵan shyǵarmashylyq trýppa belsene atsalysyp, jıylǵan jurtshylyqqa Naýryz meıramynyń ómirge kelý tarıhynan syr qozǵaıtyn qyzyqty qoıylymyn tartý etti. Dástúrli ánshiler ánnen shashý shashty. Teatrlandyrylǵan konserttik baǵdarlama sońynda Elbasy Nursultan Nazarbaev halyqqa óziniń júrekjardy quttyqtaýyn jetkizdi.
– Qurmetti otandastar! Kóktem, jylý, jańarý, jaqsylyq kúni– Áz-Naýryz meıramy barsha qazaqstandyqtarǵa qutty bolsyn! Ulystyń uly kúni – baǵzydan kele jatqan ulyq merekemiz. Kezinde birshama ýaqyt joǵaltyp alyp edik. Endi, mine, Táýelsizdigimizben birge qaıtadan ortamyzǵa oralyp otyr. Kúntizbe boıynsha 1 qańtarda esikten kiretin Jańa jyldy óz zamanynda I Petr Batys Eýropadan ákelgen eken. Onyń da óz orny bar. Áıtse de, Naýryz – qazaq úshin erekshe meıram. Kún men túnniń teńelip, barsha tirishilik ataýlynyń oıanyp, aınalany shýaqqa, jylylyqqa, meıirimge bóleıtin kezi ǵoı – bul mezgil. Naýryzdy qazaq ejelden-aq asyǵa kútken. Týǵan-týys, kórshi-qolań bir-biriniń úıine qonaqqa baryp, arqa-jarqa aralasqan. Kelispeı qalǵan adamdar keshirim surasyp, tabysqan. Demek, Naýryz – tatýlyq pen birliktiń, jańarýdyń merekesi. Túbinde bul meıram bizdiń negizgi Jańa jylymyz bolady.
Táýelsizdigimizdiń osynaý 26 jyldyq tarıhynda biz kóp sharýa bitirdik. Az ǵana ýaqyt ishinde Qazaqstanymyz álemdik arenadaǵy óz ornyn belgilep, dúnıejúzine belgili memleket boldy. Qolymyzdaǵy osy barymyzdy kózimizdiń qarashyǵandaı saqtap, baǵalaýymyz kerek. Sebebi eldiń birligi, ortaq maqsat jolynda bir judyryq bolyp jumylýy – bolashaq tabystarymyzdyń kózi bolyp sanalady. Qazaqta: «Eski jyl esirkesin, jańa jyl jarylqasyn» degen jaqsy sóz bar. Endeshe, ulys oń bolsyn! Barlyǵyńyzdy Áz-Naýryz merekesimen quttyqtaımyn! Otbasylaryńyzǵa amandyq, baqyt, bereke men birlik tileımin!» – dep Elbasy óz quttyqtaýyn jetkizdi.
Konsert sońynda Memleket basshysy EKSPO kórme keshenin aralap, merekelik is-sharalarmen tanysty.
Bıyl Naýryzǵa oraılastyrylǵan baǵdarlamalardyń basym bóligi osy – EKSPO kórme kesheniniń aýmaǵyndaǵy alańda ótti. Qala turǵyndary men qonaqtary úshin etnokórme ashylyp, kelýshilerdi Aldar Kóse, Qojanasyr, Tazsha bala syndy ertegi keıipkerleri qarsy alyp, kóterińki kóńil-kúı syılady. Elordalyq teatrlardyń artısteri kórermenderdi ulttyq salt-dástúr, ádet-ǵuryptarmen tanystyrdy, Qyshshylar, zergerler, kıiz basý men sándik-qoldanbaly óner sheberleri qoldan jasalǵan buıymdaryn kópshilik nazaryna usyndy. Kıiz úı qalashyǵynyń aýmaǵyndaǵy syıymdylyǵy 1000 lıtrlik taıqazan ornatylyp, naýryz kóje taratyldy. Sonymen qatar ulttyq oıyndar oınatylyp, jınalǵan qaýymnyń nazaryna otandyq jetekshi artısterdiń qatysýymen merekelik konsert usynyldy. Halyqtyń kóńili kóterilip, sanaýly saǵan ishinde EKSPO alańyn shat-shadyman kúıge bóledi. Merekelik is-shara 22 naýryz kúni óz jalǵasyn tabady.
Nazerke JUMABAI,
«Egemen Qazaqstan»