Shyǵysqazaqstandyqtar Naýryz meıramyn keń kólemde atap ótip jatyr.
Túrki halyqtaryna ortaq tól mereke bıyl óńirde Astananyń 20 jyldyǵy aıasynda ótip, oblys ortalyǵy – О́skemendegi Abaı alańynda Elordanyń 20 jyldyǵyna oraı 20 kıiz úı tigilip, jurtshylyq «Qosh keldiń, áz Naýryz» atty teatrlandyrylǵan kórinister men merekelik konsertti tamashalady. Reseıdiń Barnaýyl qalasynan arnaıy kelgen sıqyrshylar alańǵa jıylǵan halyqqa erekshe kóńil-kúı syılady.
Alańdaǵy 20 kıiz úıdiń birin О́skemendegi Sársen Amanjolov atyndaǵy Shyǵys Qazaqstan memlekettik ýnıversıtetiniń ujymy tigipti. Kıiz úıdiń ishi de ulttyq jádigerlermen bezendirilipti. Ýnıversıtet rektory Muhtar Tólegen bilim ordasy bıyl áz-Naýryz meıramyna erekshe ázirlengenderin aıtady. «Biz Naýryz merekesin 21 naýryz kúni ýnıversıtet qabyrǵasynda keń kólemde atap óttik. Merekelik shara bes kezeńnen turdy. Birinshi kezeńde elimizdi mekendeıtin ártúrli halyqtardyń dástúri men tarıhyn, ulttyq taǵamdaryn kópshilik nazaryna usyndyq. Ekinshi kezeńde halqymyzdyń tusaý kesý rásimin kórsettik. Oblys ákiminiń orynbasary Ásem Núsipova kishkene búldirshinge aq jol tilep, tusaýyn kesti. Stýdentterimiz daıyndaǵan konserttik baǵdarlama, olar oryndaǵan dástúrli ánder men ártúrli sporttyq saıystar sharaǵa jınalǵandardyń, kelgen qonaqtardyń kóńilinen shyqty dep oılaımyn», - deıdi Muhtar Ádilbekuly.
Ulystyń uly kúni merekesine oblystyq meshittiń shaqyrýymen Barqytbeldiń baýraıynan qoldaryna búrkitterin qondyryp, Táttimbet Kápuly men Erzat Baıqadamov bastaǵan seri jigitter de kelipti. Qyran kórmegen qalalyqtar qus patshasymen sýretke túsip bir qarq boldy. «Bir Allasy, tórt qubylasy, bes paryzy, jeti qazynasy bar, uldary attyń jalynda uıyqtap, kelinderi túıeniń qomynda bosanǵan qazaq emespiz be? Biz ózge jurttan ozsaq, salt-dástúrimizben, ónerimizben, ulttyq qundylyqtarymyzben ozamyz. Qandaı zaman bolsa da ádet-ǵuryp, jol-joralǵylarymyzdy joǵaltýǵa bolmaıdy. Sondyqtan qusbegilik ónerimizdi nasıhattaıyq, jurtqa kórseteıik dep sonaý jerden arnaıy keldik. Búrkitterdi ushyryp ta kórseter edik, oǵan myna jer qolaısyzdaý. Áıtpese, qyrandy qolǵa shaqyryp, shyrǵaǵa túsirýge bolar edi», - deıdi úrjarlyq búrkitshi Táttimbet Kápuly.
О́skemendegi búgingi jarqyraǵan aýa-raıy da turǵyndardyń kóńilin kótere túskendeı. Barlyǵy da rıza keıipte bir-birin merekemen quttyqtap, jyly lebizderin bildirip jatyr. «Barshalarńyzdy Ulystyń uly kúnimen shyn júrekten quttyqtaımyn. Jýannyń jińishkerip, jińishkeniń úziletin shaǵy. «Toqty toımas, shómish keppes» deıtin kez. Búkil halyq jańa jyldyń kelip jatqanyn, shýaqty kúnder bastalǵanyn sezingendeı. Naýryz - at tóbelindeı toptyń ǵana emes, eldiń, halyqtyń meıramy bolýy kerek. Búgin soǵan kýá boldyq», - deıdi О́skemendegi oblystyq drama teatrdyń kórkemdik jetekshisi Sahan Ákeleev.
Sonymen qatar jyldaǵydaı dástúrli palaý festıvali ótip, kópshilikke palaý tegin taratyldy. Alańnyń bir shetinde aýyl sharýashylyǵy ónimderiniń jármeńkesi uıymdastyrylyp, qalalyqtar azyq-túlikti arzan baǵamen satyp aldy.
Azamat QASYM,
«Egemen Qazaqstan»
О́SKEMEN