Fransııanyń ońtústigindegi Od departamentinde bolǵan shabýyldan 4 adam qaıtys boldy, marqumdardyń qatarynda polısııa ofıseri de bar. Odan bólek 16 adam jaraqattanǵan.
Fransııa IIM málimetinshe, sýpermarketke kelýshilerdi tutqynǵa alǵan shabýylshy arnaıy ásker qolynan qaza tapty. Onyń esimi – Redýan Lakdım, 26 jastaǵy Marokkonyń týmasy. Esirtki, usaq zań buzýshylyqtarmen buryn da kózge túskenin, alaıda radıkaldyq kózqarastarymen áıgilenbegenin aıtady. Kýágerlerdiń sózinshe, Lakdım «Islam memleketi» uıymynyń áskeri ekenin aıtqan ári Parıjdegi 2015 jylǵy qarashada bolǵan aýqymdy terrakt kezinde basty kúdikti retinde tutqyndalǵan Salah Abdeslamdy túrmeden bosatýdy talap etken.
«Elimiz ıslam terrorlyq shabýylyna ushyrady», - dep málimdedi Fransııa Prezıdenti Emmanýel Makron. Sonymen birge atysta qaza tapqan polısııa ofıseri Beltramnyń ólimin «naǵyz qaharmandyq» dep atady. Arno Beltram qyzmet etken Od departamenti aldynda kóńil aıtyp kelýshilerdiń qatary tolastar emes.