Jahandyq básekege qabilettilikti arttyrý, bilim jáne ǵylym arqyly aıqyn maqsat qalyptastyrý men oǵan jetý búginde asa mańyzdy bolyp otyr. Jyl ótken saıyn bilim salasyna degen talap ta joǵarylap keledi.
Bilimdi urpaq qalyptastyrý úshin memleket tarapynan da tıisti kóńil bólinýde. О́ńirlerde jyl saıyn jańa mektepter paıdalanýǵa berilýde. Zamanaýı tehnologııalarmen jabdyqtalǵan bilim oshaqtary oqýshylardyń sapaly bilim alýyna da jaǵdaı jasaıdy. Deı turǵanmen, keıbir aýyldarda apatty jaǵdaıdaǵy mektepter áli de barshylyq.
Jambyl oblysynda búginde apatty dep tanylǵan 5 mektep bar. Qordaı aýdanynyń Soǵandy aýylyndaǵy №33, Kóktóbe aýylyndaǵy №40 jáne Kúnbatys aýylyndaǵy №11 negizgi mektepter apatty jaǵdaıda. Sondaı-aq Talas aýdanynyń Qasqabulaq aýylyndaǵy Qasqabulaq orta mektebi men T.Rysqulov aýdanynyń Jalpaqsaz aýylyndaǵy Jalpaqsaz bastaýysh mektebi de apatty dep tanylǵan. Barlyq máseleni bir kúnde sheshý múmkin emes, degenmen de munyń bári ata-analar men oqýshylardyń alańdaýshylyǵyn týdyrmaı qoımaıdy. Onyń ústine bıyl Áýlıeata óńirinde sońǵy jarty ǵasyrda bolmaǵan qys boldy. Sol kezderi Moıynqum aýdanynyń biraz aýyldaryndaǵy mektepterde sabaq toqtatyldy. Al osyndaı kezde apatty mektepte oqyp jatqan balalardyń jaıyn elestetý qıyn.
Oblystyq bilim basqarmasy basshysynyń orynbasary Jámılá Bekbatyrovanyń aıtýynsha, apatty mektepterdi joıý úshin tıisti jumystar júrgizilip jatyr. Naqty aıtsaq, Qordaı aýdanynyń Soǵandy jáne Kóktóbe aýyldaryndaǵy árqaısysy 50 oryndyq negizgi mektepter men Talas aýdanynyń Qasqabulaq aýylyndaǵy 120 oryndyq Qasqabulaq orta mektebiniń qurylysy aǵymdaǵy jyly aıaqtalady dep josparlanýda.
Atalǵan 3 mekteptiń qurylysy bıyl aıaqtalǵanymen, qalǵan 2 mekteptiń jaıy keıinge qalyp tur. T.Rysqulov aýdanynyń Jalpaqsaz aýylyndaǵy Jalpaqsaz orta mektebiniń qurylysy aǵymdaǵy jyly bastalyp, kelesi jyly aıaqtalmaq. Al Qordaı aýdanynyń Kúnbatys aýylyndaǵy №11 negizgi orta mekteptiń máselesi 2019-2020 jyldarǵa qaraı sheshilmek. Oǵan deıin oqýshylar apatty mektepterde bilim alýǵa májbúr.
Sonymen qatar Taraz qalasyndaǵy №24 jáne №55 orta mektepter, Baızaq aýdany, Baızaq aýylyndaǵy Sydyq Ablanov atyndaǵy orta mektep pen atalǵan aýdannyń Aqsholaq stansasyndaǵy Aqsholaq orta mektepteri de búginde úsh aýysymda jumys isteıtin mektepter qatarynda. Úsh aýysymda bilim beretin 3 mekteptiń qurylysy aǵymdaǵy jyly aıaqtalsa, Aqsholaq orta mektebiniń qurylysy bıyl jergilikti bıýdjet esebinen bastalyp, kelesi jyly aıaqtalady eken.
Oblystyq bilim basqarmasynyń málimetinde kórsetilgen derekter aldaǵy ýaqyttarda tolyǵymen iske asatyn bolsa, eki jyldan keıin óńirde apatty dep tanylǵan jáne úsh aýysymda bilim beretin mektepterdiń máselesi sheshiledi. Aýyldardaǵy bilim oshaqtarynyń jaı-kúıi sheshilgen jaǵdaıda ǵana bilim salasyndaǵy serpindiligimiz arta túspek.
Hamıt ESAMAN,
«Egemen Qazaqstan»
Jambyl oblysy