AQSh-tyń Maıamı qalasynda ótip jatqan tennısten qyzdar arasyndaǵy Miami Open halyqaralyq týrnırine Qazaqstannyń birinshi raketkasy Zarına Dıas ta qatysyp jatyr.
Keshe otandasymyz júlde qory 8 mıllıon dollardy quraıtyn jarystyń tórtinshi aınalymyna shyqty. Dıas eki saǵatqa jalǵasqan úshinshi aınalymda germanııalyq Karına Ýıthofty (álemniń 57-raketkasy) jeńdi. Bul kezdesýde Zarına qarsylasyna qaraǵanda saýatty oıyn kórsetip, jeńiske ábden laıyq ekenin kórsetti.
Kezdesýdiń birinshi setinde Qazaqstandyq tennısshi germanııalyq qarsylasynan 4:6 esebimen jeńilip qaldy. Ekinshi sette de Dıas Karına Ýıthofqa 4:5 nátıjesimen ese jiberip jatqan. Alaıda aqyly men kúshin bir arnaǵa toǵystyra bilgen jerlesimiz germanııalyq tennısshiden jeńisti julyp aldy. Esep – 7:5. Ekinshi sette Zarına oń aıaǵynan jaraqat alyp, medısınalyq kómek alýǵa májbúr boldy. Degenmen dárigerler otandasymyzǵa der kezinde qajetti emdi qoldanyp, oǵan jarysty jalǵastyrýyna bolatynyn aıtty.
Al úshinshi sette Dıas Ýıthofqa esh múmkindik qaldyrmaı, 6:0 esebimen aıqyn utyp, bul setti de óz paıdasyna sheshti. Germanııalyq tennısshi dál jáne anyq soqqy jasaǵanymen, Zarına onyń shabýyldaryna toıtarys berip otyrdy. Oıyndaǵy qorytyndy esep – 4:6, 7:5, 6:0.
Bul eki tennısshiniń ózara ekinshi ret kezdesýi. Buǵan deıin Zarına Dıas pen Karına Ýıthof 2016 jyldyń mamyr aıynda Fransııada ótken French Open týrnıriniń alǵashqy kezeńinde jolyqqan. Ol oıynda da otandasymyz 2:6, 6:4, 6:2 nátıjesimen jeńiske jetken bolatyn. Eki tennısshi arasyndaǵy jeke kezdesý boıynsha Zarına Dıas 2:0 esebimen alda tur.
Zarına Dıas Miami Open týrnıriniń ekinshi aınalymynda «Úlken dýlyǵa» týrnıriniń eki jarysyn jeńip alǵan (2004 jylǵy AQSh Ashyq chempıonaty men 2009 jylǵy Fransııa Ashyq chempıonaty) reseılik tennısshi Svetlana Kýznesovany jarys jolynan shyǵaryp jiberdi. Eki setke sozylǵan oıynda Zarına Dıas qarsylasynan 6:1, 6:3 esebimen basym túsken-di. Aıta keteıik, qazirgi tańda Kýznesova álemniń 37-raketkasy. Al birinshi aınalymda jerlesimiz amerıkalyq Djenıffer Bredıden (álemniń 80-raketkasy) 7:5, 7:6 esebimen basym túsken.
Endi Zarına Dıas búgin Miami Open týrnıriniń shırek fınalynda álemniń altynshy raketkasy chehııalyq Karolına Plıshkovamen oınaıdy. Jeńiske jetken tennısshi shırek fınalǵa shyǵady. Maıamıdegi jarys 1 sáýirde aıaqtalady.
Álı BITО́RE,
«Egemen Qazaqstan»